Пракат мастацкага фільма "Не гульня", створанага на кінастудыі "Беларусьфільм" і прысвечанага 100-годдзю Узброеных Сіл Рэспублікі Беларусь, стартуе ў кінатэатрах краіны 12 красавіка.

Новая карціна - поўнаметражны ігравы фільм у жанры драмы. Паводле сюжэта, малады амбіцыйны праграміст Аляксей Кузьмянкоў, які распрацоўвае камп`ютарныя гульні, перажывае прафесійную няўдачу. Каб напісаць рэалістычны сцэнарый гульні, ён вырашае пайсці ў армію, у танкавыя войскі.

Праходзячы службу, Аляксей развітваецца з ілюзіямі адносна лёгкіх перамог і хуткіх дасягненняў, пераадольвае ўласныя слабасці і спакусы, сустракае надзейных і верных сяброў, становіцца сапраўдным мужчынам і адкрывае новыя перспектывы ўласнага жыцця.

Рэжысёр мантажу - Ігар Пашкевіч. Аўтары сцэнарыя - Яўген Амельчанка, Канстанцін Гагарын, Дзяніс Нупрэйчык. Аператар-пастаноўшчык Віктар Бандаровіч. Мастак-пастаноўшчык Андрэй Тоўсцік. Кампазітар - Максім Кашавараў. Галоўныя ролі выконваюць маладыя акцёры Павел Паўлюць, Мікіта Лубянько, Барыс Шумілін, Эльдар Данільчык. Таксама ў карціне задзейнічаны Святлана Анікей, Таццяна Янкевіч, Ігар Сігаў, Пётр Юрчанкаў, Дзмітрый Глазачаў, Андрэй Новік. Для Пятра Юрчанкава роля ў гэтым фільме стала апошняй. Здымкі прайшлі ў Мінску, на "Лініі Сталіна", Кургане Славы, у ваенным гарадку ў Печах.

Кансультантамі карціны выступілі прадстаўнікі Міністэрства абароны Беларусі. У карціне знайшлося месца каханню, сяброўству, здрадзе, мэтанакіраванасці, пераадоленню сябе, гераізму, подзвігу.

А таксама стральбе, пагоням, выбухам, танкавым бітвам і рэканструкцыі баёў часоў Вялікай Айчыннай вайны. Мастацкі фільм "Не гульня" створаны на кінастудыі "Беларусьфільм" па заказе Міністэрства культуры Беларусі пры ўдзеле Міністэрства абароны.

30 сакавіка 2018, Мінск
БЕЛТА