Прэм`ер-міністры Беларусі Сяргей Румас і Кыргызстана Мухамедкалы Абылгазіеў адкрылі 26 лістапада памятны знак Чынгізу Айтматаву ў мінскім парку, які носіць імя пісьменніка.

Памятны знак створаны з ініцыятывы кіргізскага боку беларускім скульптарам Алесем Шацілам. У 2018 годзе адзначаецца 90-годдзе з дня нараджэння Чынгіза Айтматава.

У цырымоніі ўрачыстага адкрыцця памятнага знака ўзялі ўдзел надзвычайны і паўнамоцны пасол Кыргызстана ў Беларусі Кубанычбек Амураліеў, намеснік старшыні Мінгарвыканкама Ігар Юркевіч, прадстаўнікі дзяржаўных органаў і арганізацый Беларусі, дыпламатычных місій, творчай інтэлігенцыі і грамадскасці.

Як адзначыў Румас, 2018 год знакавы для беларуска-кіргізскага супрацоўніцтва: у студзені краіны адзначылі 25-годдзе ўстанаўлення дыпламатычных адносін.

"За чвэрць стагоддзя нашы краіны не на словах, а на справе выбудавалі трывалыя сувязі для канструктыўнага ўзаемадзеяння, што грунтуецца на прынцыпах сяброўства, партнёрства і ўзаемнай павагі", — сказаў прэм`ер-міністр Беларусі.

Ён нагадаў, што імем Чынгіза Айтматава названыя вуліцы ў Бішкеку, Казані, Анкары, Баку, Астане, Ташкенце, Люксембургу, шэраг аб`ектаў у Маскве, Санкт-Пецярбургу і іншых гарадах.

"І я рады, што такі аб`ект з`явіўся і ў Мінску, — падкрэсліў Румас. — Мы надаем гэтаму важнае значэнне не толькі з пункта гледжання далейшага ўмацавання сяброўскіх адносін паміж нашымі краінамі. Тым самым мы аддаем даніну глыбокай павагі вялікаму пісьменніку і гуманісту, якога шануюць і памятаюць у Беларусі".

У сваю чаргу Мухамедкалы Абылгазіеў ад імя кіргізскага народа і прэзідэнта Кыргызскай Рэспублікі выказаў словы падзякі беларускаму народу, кіраўніцтву краіны, а таксама Мінгарвыканкаму за рашэнне аб прысваенні імя Чынгіза Айтматава аднаму з паркаў беларускай сталіцы.

"Вестка аб ўшанаванні памяці такога значнага для нас чалавека, які зрабіў вялікі ўнёсак не толькі ў жыцці кыргызстанцаў, але і ўсяго свету, была ўспрынятая з вялікай радасцю ў Кыргызстане і расцэненая як даніна глыбокай павагі да памяці пісьменніка", — сказаў прэм`ер. Ён выказаў упэўненасць, што парк імя Айтматава "будзе служыць яркім сімвалам сяброўства паміж двума народамі".

БелаПАН
Мінск, 27 лістапада 2018