"Наступны год — гэта год сур`ёзны, — цытуе Лукашэнку прэс-служба прэзідэнта. — У нас пачынаецца палітычная вакханалія, якая будзе доўжыцца мінімум паўтара года. І выбары парламента, і прэзідэнта. Яны ніколі не дадавалі стабільнасці і спакою ў нашым грамадстве. Нам трэба ва ўласцівай манеры прайсці гэты этап, не збавіўшы абароты. Народ нам гэта не даруе. Палітычная кампанія — гэта экзамен, таму нам прыйдзецца здаваць і адзін, і другі экзамен, і даваць справаздачу перад народам. Нашы людзі ўмеюць патрабаваць. Да гэтага трэба быць гатовымі і выразна кіраваць тымі працэсамі, якія будуць у сферы вашага загадвання".

Лукашэнка арыентаваў чыноўнікаў на канкрэтнае вырашэнне праблем людзей і задач па павышэнні ўзроўню жыцця насельніцтва. "Я за свой перыяд прэзідэнцтва бачыў розныя народы, — сказаў ён. — Якія б ні былі беларусы, лепшых за нашых людзей няма. Гэта незбалаваныя, цярплівыя людзі, якія ўмеюць працаваць. Адпаведна і мы павінны дзейнічаць. Мы павінны адпавядаць свайму народу. Таму стаўцеся па-чалавечы да людзей. Там, дзе трэба прымусіць працаваць кагосьці, — прымусьце. Каму трэба дапамагчы — дапамажыце".

Кіраўнік дзяржавы адзначыў, што новыя кіраўнікі — гэта маладыя перспектыўныя кадры. "Адзінае, пра што я вас папрашу: каб вы, прыйшоўшы на працу, не падносілі нейкія паперы. Вы — кіраўнікі, і ў рот глядзець, нават начальству, забараняецца. Вы павінны прымаць рашэнні і несці за іх адказнасць. Таму што намеснікі старшынь аблвыканкамаў і кіраўнікі мясцовых органаў улады — гэта наша асноўнае звяно, ад якога залежыць развіццё краіны", — заявіў Лукашэнка.

"Дысцыпліна павінна быць, — падкрэсліў ён. — Але вы не маўклівыя людзі. Працаваць па прынцыпе "чаго жадаеце?" катэгарычна забараняецца. Вы павінны быць актыўнымі ў прыняцці рашэнняў. Вы спецыялісты, у вас немалы досвед працы, жыццёвы вопыт. Дзейнічайце. Не чакайце з мора надвор`я, што вам хто-небудзь што-небудзь дасць. Разлічвайце на тое, што ў вас ёсць".

У найбліжэйшыя два гады ў Беларусі пройдуць дзве выбарчыя кампаніі — прэзідэнцкія і парламенцкія выбары. Згодна з заканадаўствам выбары дэпутатаў Палаты прадстаўнікоў павінны прайсці не пазней за 10 верасня 2020 года, прэзідэнта — не пазней за 30 жніўня 2020-га. У сувязі з гэтым не выключана, што адна з выбарчых кампаній можа прайсці ў 2019 годзе.

Таццяна Каравянкова, БелаПАН
Мінск, 13 лістапада 2018