Украінскі пісьменнік лічыць, што дасягнуць гэтага ўдалося дзякуючы міжнароднаму рэзанансу і салідарнасці, а таксама прынцыповай пазіцыі афіцыйнага Кіева. "Тое, што пытанне пазітыўна вырашылася, — гэта добрае сведчанне, што супярэчнасцяў паміж намі няма. Вельмі разлічваю, што гэта не тэндэнцыя, а выпадак", — пракаментаваў Жадан.

Сяргей Жадан прыбыў у Мінск для ўдзелу ў VI Міжнародным паэтычным фестывалі імя Міхася Стральцова "Вершы на асфальце", які адкрыўся 10 лютага.

Раніцай 11 лютага стала вядома, што Жадану паставілі штамп у пашпарт аб забароне на ўезд у Беларусь на няпэўны тэрмін. Паводле слоў пісьменніка, прыблізна а другой гадзіне ночы да яго ў нумар гатэля ў Мінску уварваўся міліцэйскі патруль. Нічога не тлумачачы, міліцыянеры даставілі Жадана ў аддзяленне, а затым адвезлі ў Ленінскае РУУС. Ноч пісьменнік правёў у ізалятары.

"У Ленінскім зноў прабівалі па базе, нарэшце растлумачылі — аказваецца, мне яшчэ ў 2015-м забаронены ўезд на тэрыторыю Расійскай Федэрацыі з фармулёўкай "за дачыненне да тэрарыстычнай дзейнасці". А паколькі Беларусь і Казахстан знаходзяцца з РФ у адной візавай зоне, то забарона аўтаматычна пераходзіць і на Беларусь з Казахстанам. І калі немагчымасць трапіць у Казахстан я яшчэ неяк перажыву, то за Беларусь крыўдна", — напісаў у сацсетках Сяргей Жадан.

Гэтая навіна стала міжнародным скандалам. Пасла Беларусі ва Украіне выклікалі ў Міністэрства замежных спраў. Кіраўнік украінскага МЗС патэлефанаваў міністру замежных спраў Беларусі Уладзіміру Макею. Украіна ў знак салідарнасці з Жаданам закрыла свой стэнд на Міжнароднай кніжнай выставе ў Мінску.

На працягу 11 лютага Жадан планаваў пакінуць Беларусь, але з ім сустрэўся прадстаўнік МЗС, забраў яго пашпарт і паабяцаў, што дакумент неўзабаве вернуць з адменай забароны на ўезд.

"Я лічу, што рашэнне адмянілі дзякуючы націску беларускага грамадства, прынцыповай пазіцыі кіраўніцтва Украіны і міжнароднаму рэзанансу. Гэты выпадак сведчыць, што якім бы моцным ні быў аўтарытарны рэжым, грамадства мацнейшае і ў Беларусі зрухі да дэмакратыі ўсё ж такі адбываюцца", — заявіў у каментары Жадан.

Сяргей Жадан — вядомы ўкраінскі паэт, празаік, эсэіст, перакладчык. Жыве і працуе ў Харкаве. Рэгулярна выступае са сваімі творамі ў розных гарадах Украіны і Еўропы, у тым ліку ў суправаджэнні украінскіх музыкантаў (у прыватнасці гурту "Сабакі ў космасе").

З`яўляўся актыўным удзельнікам харкаўскага Еўрамайдана, у сакавіку 2014 года пацярпеў падчас сутыкненняў паміж прыхільнікамі і праціўнікамі гэтага руху.

У 2016 годзе быў узнагароджаны дзяржаўнай прэміяй "Украінская кніга года", сродкі ад якой накіраваў на дапамогу дзіцячым установам Луганскай вобласці.

БелаПАН
Мінск, 12 лютага 2017