Адна з асноўных задач стратэгіі - павышэнне эфектыўнасці дзяржаўнай падтрымкі вытворчасці фільмаў. Гэта значыць паступовы пераход да аказання дзяржпадтрымкі вытворцам (прадзюсарам) фільмаў шляхам выдзялення грантаў на забеспячэнне расходаў, звязаных з вытворчасцю і папулярызацыяй фільмаў па сацыяльна значных тэмах па выніках конкурсаў, што праводзяцца ў фармаце пітчынгаў - адкрытых абарон кінапраектаў.

Патрабаванні да вытворцаў фільмаў, якія прэтэндуюць на атрыманне дзяржаўнай падтрымкі, стануць больш строгімі. Акрамя таго, павінна быць забяспечана празрыстасць і падкантрольнасць беларускаму боку расходаў і даходаў партнёраў па сумеснай вытворчасці фільмаў з выкарыстаннем дзяржаўных сродкаў. Пры Міністэрстве культуры плануецца стварыць савет прадзюсараў для актывізацыі дзяржаўна-прыватнага партнёрства ў фільмавытворчасці і папулярызацыі фільмаў.

Згодна з праектам стратэгіі неабходна ўдасканаленне нарматыўнага прававога забеспячэння сферы кінематаграфіі. У прыватнасці, пераход ад дзяржаўнай рэгістрацыі фільмаў да іх класіфікацыі, якую будзе ажыццяўляць упаўнаважаная ведамствам арганізацыя. Плануецца стварэнне і размяшчэнне ў інтэрнэце інфармацыйнага рэсурсу "Дзяржаўны рэгістр фільмаў".

Праект стратэгіі апісвае шляхі забеспячэння ўстойлівага развіцця нацыянальнай кінастудыі "Беларусьфільм". Кінастудыя павінна і будзе развівацца як дзяржаўнае прадпрыемства, вядучая арганізацыя кінематаграфіі, якая ажыццяўляе вытворчасць фільмаў у Беларусі, спалучае функцыі кінастудыі і кінафабрыкі. Будзе забяспечаны рост вытворчасці фільмаў, аб`ёмаў даходаў ад рэалізацыі маёмасных правоў на ўласную прадукцыю і аказанне кінатэхналагічных паслуг. Для забеспячэння ўстойлівага развіцця кінастудыі прадугледжаны шэраг мерапрыемстваў. У прыватнасці, аптымізацыя штатнай колькасці апарату кіравання кінастудыі, распрацоўка эканамічна абгрунтаваных умоў аплаты працы работнікаў, актывізацыя супрацоўніцтва з тэлеканаламі, штогадовае павелічэнне паслуг пабочным арганізацыям.

Развіццё пракату і паказу фільмаў, захаванне даступнасці гэтага віду культурных паслуг для насельніцтва ўсіх рэгіёнаў Беларусі прадугледжвае дзяржаўную падтрымку пракату і паказу фільмаў шляхам прадастаўлення субсідый, рэканструкцыю, капітальны рамонт будынкаў кінатэатраў і іншых месц паказу фільмаў, мадэрнізацыю іх абсталявання за кошт сродкаў бюджэтаў, арганізацыю сумесна з кінастудыяй, рэспубліканскімі і рэгіянальнымі тэлеканаламі работы па прапагандзе беларускіх фільмаў.

Падрыхтоўцы кінематаграфічных кадраў з улікам патрэбнасцей кінавідэагаліны краіны таксама ўдзелена вялікая ўвага. У Беларускай дзяржаўнай акадэміі мастацтваў плануецца пачаць падрыхтоўку кадраў па спецыяльнасцях "мастак-аніматар", "рэжысёр мантажу фільма". На базе кінастудыі плануецца стварыць філіялы кафедраў рэжысуры кіно, кінатэлеаператарства Беларускай дзяржаўнай акадэміі мастацтваў.

Міжнароднае супрацоўніцтва ў сферы кінематаграфіі павінна адбывацца ў інтарэсах айчынных вытворцаў фільмаў і ўмацавання статусу краіны ў сусветным фестывальным руху. Для гэтага неабходна прыцягваць замежныя інвестыцыі ў вытворчасць фільмаў, ініцыіраваных беларускім бокам, а таксама на выкананне работ па вытворчасці сумесных фільмаў на тэрыторыі Беларусі, праводзіць кінематаграфічныя мерапрыемствы, накіраваныя на фарміраванне станоўчага іміджу рэспублікі, папулярызаваць беларускія фільмы на знешнім кіна- і тэлевізійным рынках.

Стратэгія мае на мэце развіццё дзяржаўна-грамадскага партнёрства ў сферы кінематаграфіі. Гэта прадугледжвае практыку аказання падтрымкі Беларускага саюза кінематаграфістаў і Беларускай гільдыі акцёраў кіно ў ажыццяўленні іх дзейнасці, прыняцце Міністэрствам культуры, кінастудыяй, Беларускім саюзам кінематаграфістаў, Беларускай гільдыяй акцёраў кіно планаў сумесных мерапрыемстваў.

Праект стратэгіі развіцця кінавідэагаліны Рэспублікі Беларусь на 2015-2020 гады распрацаваны па даручэнні ўрада для вырашэння праблем у галіне, адзначыў міністр культуры.

16 снежня 2014, Мінск
БЕЛТА