Пра гэта паведамляе сайт грамадскага агенцтва "Арт Сядзіба", якое выступіла арганізатарам фестывалю пры падтрымцы Беларускага саюза мастакоў.

Першы фестываль адбыўся ўсяго прыблізна два месяцы таму ў мінскай арт-прасторы"ДК". Ён быў арганізаваны ў межах кампаніі "Зробім лепш" Асамблеі НДА пры ўдзеле шэрагу грамадзянскіх ініцыятыў і суполак беларускай культуры. Мінчане выказалі цікавасць і ў цэлым станоўча паставіліся да гэтага мерапрыемства, аднак шмат нараканняў выклікала пляцоўка, дзе праводзіўся фестываль, якая не вытрымлівала наплыву наведвальнікаў.

Гасцей другога фестывалю "Дзень вышыванкі" чакае адукацыйная і забаўляльная праграма. Апрача таго, будзе працаваць кірмаш прадукцыі, якая мае адносіны да нацыянальнай культуры.

Можна будзе ўзяць удзел у майстар-класах па ткацтве, выцінанцы і іншых народных рамёствах, паслухаць лекцыю па этнаграфіі, народным і сучасным мастацтве, азнаёміцца з гісторыяй і тэхналогіямі вышыванкі.

Ахвотным пазабаўляцца "ў беларускім стылі" арганізатары прапануюць згуляць у беларускія настольныя гульні, нанесці на цела малюнкі і татуіроўкі з нацыянальнымі ўзорамі, узяць удзел у шматлікіх конкурсах і паслухаць беларускіх музыкантаў.

Рамеснікі прапануюць на кірмашы свае ўпрыгажэнні і сувеніры, традыцыйныя вышыванкі, а таксама сучаснае адзенне з беларускім арнаментам.

Уваход на фестываль бясплатны. 

Мінск, 26 лістапада 2014

Захар Шчарбакоў, БелаПАН