Удзел у фестывалі прымуць не толькі творчыя калектывы з розных краін, але і мастакі, фатографы, літаратары - усе, хто папулярызуе беларускую культуру за мяжой.
II Фестываль мастацтваў беларусаў свету можа стаць адным з культурных мерапрыемстваў, прымеркаваных да святкавання Дня Незалежнасці, адзначыў дырэктар Рэспубліканскага цэнтра нацыянальных культур Міністэрства культуры Беларусі Міхаіл Рыбакоў.
"Цяпер разглядаецца пытанне аб правядзенні фестывалю ў час святкавання Дня Незалежнасці або Дня горада. Канчатковае рашэнне па гэтым пытанні будзе прымацца на ўзроўні намесніка прэм`ер-міністра Анатоля Тозіка, пасля чаго будзем разглядаць пытанне аб пляцоўцы правядзення форуму і колькасці ўдзельнікаў", - сказаў Міхаіл Рыбакоў.
Першы фестываль мастацтваў беларусаў свету прайшоў у 2011 годзе. Ён сабраў амаль 250 прадстаўнікоў беларускай дыяспары з Арменіі, Азербайджана, Казахстана, Кыргызстана, Малдовы, Нідэрландаў, Літвы, Латвіі, Польшчы, Расіі, Украіны і ЗША.
Форум праводзіцца з мэтай шырокай прэзентацыі Беларусі, дасягненняў мастацкай творчасці, падтрымкі праектаў суайчыннікаў, якія пражываюць у розных краінах, наладжвання кантактаў з імі і аказання арганізацыйна-метадычнай дапамогі з боку дзяржаўных органаў і грамадскіх арганізацый, мастацкіх калектываў, дзеячаў культуры і мастацтваў Беларусі.
26 сакавіка 2014, Мінск
БЕЛТА
