Падрыхтаваць праект закона аб амністыі Лукашэнка публічна распарадзіўся, выступаючы са штогадовым пасланнем да народа і парламента 8 мая. Ён даручыў ураду распрацаваць такі дакумент аператыўна, каб прымеркаваць амністыю да "галоўнага дзяржаўнага свята — Дня незалежнасці" (3 ліпеня. — БелаПАН.) "Я ўжо аб гэтым гаварыў: дастойныя людзі пакутуюць у засценках, а нягоднікаў мы выпускаем — пад націскам ці не пад націскам", — заявіў Лукашэнка.

23 мая ўпраўленне інфармацыі і грамадскіх сувязей МУС паведаміла, што дэпартамент выканання пакаранняў (ДВП) падрыхтаваў і ўнёс на разгляд Савета міністраў праект закона аб амністыі, які ўзгоднены з усімі зацікаўленымі дзяржорганамі. Паводле папярэдніх ацэнак, з месцаў пазбаўлення волі можа быць вызвалена каля 2,8 тыс. чалавек. Больш чым 7 тыс. асуджаных у рамках амністыі плануецца скараціць на год тэрмін пакарання.

Калі прапанаваны варыянт закона будзе ўхвалены кіраўніком дзяржавы, то ўжо ў ліпені на волю выйдуць непаўналетнія, цяжарныя жанчыны, жанчыны і адзінокія мужчыны, якія маюць непаўналетніх дзяцей, інваліды I і II груп, хворыя на анкалагічныя захворванні, удзельнікі ліквідацыі наступстваў катастрофы на ЧАЭС і пацярпелыя ад катастрофы на ЧАЭС, а таксама ветэраны баявых дзеянняў на тэрыторыі іншых дзяржаў. Акрамя таго, ад пакарання могуць быць вызвалены асобы, якія ўчынілі злачынствы, што не ўяўляюць вялікай грамадскай небяспекі, і злачынствы, што адносяцца да катэгорыі менш цяжкіх, але пры ўмове кампенсавання прычыненага ўрону.

Амністыя, згодна з праектам закона, не распаўсюджваецца на тых, да каго раней прымяняўся адпаведны закон. Не падлягаюць амністыі асобы, якія не кампенсавалі ўрон, прычынены злачынствам, і грамадзяне, якія не вярнулі дзяржаве даход, атрыманы ад незаконнай прадпрымальніцкай дзейнасці. Не варта спадзявацца на вызваленне і асобам, якія дапусцілі асабліва небяспечны рэцыдыў. Таксама не выйдуць на волю тыя, хто не кампенсаваў расходы на дзяцей, якія знаходзяцца на дзяржаўным забеспячэнні. Не будзе паслабленняў і аб`яўленым у вышук у сувязі з ухіленнем аб адбывання пакарання па прыгаворы суда.

У ДВП асабліва падкрэслілі: амністыя не распаўсюджваецца на асоб, якія злосна парушаюць устаноўлены парадак адбывання пакарання.

Гэта будзе ўжо 12-я амністыя з 1991 года. У выніку леташняй амністыі на волю выйшлі 2.300 чалавек.

На думку аналітыкаў, вялікая верагоднасць таго, што ў ходзе амністыі будуць вызвалены калі не ўсе, то хаця б некаторыя палітзняволеныя. Амністыя дае ўладам магчымасць выканаць асноўнае патрабаванне Еўрасаюза, захаваўшы пры гэтым твар, адзначаюць эксперты.

Аднак самі палітзняволеныя настроены больш песімістычна. Так, былы кандыдат у прэзідэнты Мікалай Статкевіч нават не спадзяецца трапіць пад амністыю — аб гэтым ён заявіў у тэлефоннай размове з жонкай.

Яшчэ адзін палітзняволены, прадпрымальнік з Ваўкавыска Мікалай Аўтуховіч, у лісце сябру адзначыў: "Па-першае, гэта немагчыма, бо ўсім палітзняволеным "зроблены" парушэнні, і яны не могуць трапіць пад амністыю. Па-другое, размова аб амністыі з`яўляецца прыдуманай гульнёй для еўрапейцаў. Еўрапейцы павінны гэта разумець і не наступаць у чарговы раз на тыя ж граблі".

Сяргей Пульша, БелаПАН
Мінск, 12 чэрвеня 2012