Трое расіян, затрыманыя 10 лютага па падазрэнні ва ўчыненні буйнога крадзяжу з аўтамашыны ў Мінску, маюць дачыненне яшчэ да аднаго злачынства. Пра гэта паведамілі ў ГУУС Мінгарвыканкама.
Нагадаем, 31 студзеня каля аднаго з банкаў маладыя людзі высачылі мужчыну, які зняў буйную суму грошай. Далей за ім сачылі на ўласным аўтамабілі, чакаючы зручнага моманту. Калі "Аўдзі" ахвяры спынілася і гаспадар выйшаў, пакінуўшы грошы ў салоне, злачынцы разбілі шкло і забралі пакінуты на гумовым дыванку поліэтыленавы пакет з грашыма. Сума ўрону склала 112 мільёнаў рублёў. У дачыненні да расіян была распачата справа за крадзеж (арт. 205 КК).
Цяпер стала вядома, што затрыманыя ўчынілі крадзеж з аўтамашыны на вуліцы Заслаўскай. Таксама высачыўшы ахвяру каля банка, маладыя людзі дачакаліся, калі яго партфель застанецца ў машыне без догляду. У партфелі былі грошы і дарагія камп`ютарныя камплектуючыя. Агульная сума выкрадзенага склала 10 мільёнаў рублёў. Другая справа таксама распачата па арт. 205 КК.
Вячаслаў Будкевіч,
БелаПАНМінск, 15 лютага 2012
