Акцыя "Нашы дзеці" штогод віншуе больш за 1 млн хлопчыкаў і дзяўчынак. Такія даныя прывёў начальнік галоўнага ўпраўлення выхаваўчай работы і маладзёжнай палітыкі Міністэрства адукацыі Віктар Доўнар у праекце БЕЛТА "Краіна гаворыць".

Акцыя "Нашы дзеці" ў свой час з`явілася, каб удзяліць увагу дзецям, якія засталіся без бацькоўскай цеплыні, любові і клопату. З гадамі яна маштабавалася, нацэліўшыся таксама на высокаматываваных рабят, якія дасягнулі вышынь у грамадскай дзейнасці, пераможцаў конкурсаў, спартыўных спаборніцтваў, якія прадстаўлялі рэспубліку на міжнароднай арэне.

Як расказаў Віктар Доўнар, кожны год мерапрыемствы акцыі ахопліваюць больш за 1 млн дзяцей па ўсёй краіне. "Самая галоўная мэта і дэвіз акцыі - дайсці да кожнага дзіцяці. Перакананы, што клопатам будзе ахоплена кожнае дзіця, таму што аб`ём сродкаў, якія пералічваюць грамадскія аб`яднанні, прадпрыемствы, арганізацыі, дзяржорганы, з кожным годам расце. Калі ў 2021-2022-м было прыцягнута каля Br3,5 млн, то ўжо ў мінулым годзе - каля Br7 млн. Прадпрыемствы, арганізацыі і простыя грамадзяне актыўна адгукаюцца. У міністэрства і аблвыканкамы паступаюць званкі з пытаннямі аб тым, як можна дапамагчы, якім дзецям патрэбна падтрымка", - падкрэсліў ён.

Усё больш беларусаў хочуць далучыцца да акцыі дабра, каб дапамагчы. "Беларускі дзіцячы фонд кожны год праводзіць яе сумесна з Міністэрствам адукацыі і Міністэрствам аховы здароўя. Збіраюць сродкі для дзяцей, якія маюць якую-небудзь хваробу. У гэтым годзе - для дзяцей, якія пакутуюць ад сардэчна-сасудзістых захворванняў. У мінулым годзе удалося сабраць Br102 тыс. Магчыма, здаецца, што гэта не такая значная сума, але яна пайшла на канкрэтных дзяцей, якім патрэбна была гэта дапамога, на лячэнне. І Беларускі дзіцячы фонд вызначыў гэтых дзетак", - падзяліўся начальнік галоўнага ўпраўлення выхаваўчай работы і маладзёжнай палітыкі Міністэрства адукацыі.

Арганізатары акцыі адсочваюць лёс дзяцей, якім аказана дапамога. Для іх сем`яў такая падтрымка стала сапраўдным навагоднім і калядным цудам. Беларускі дзіцячы фонд ажыццяўляе іх патранат.

Упершыню акцыя "Нашы дзеці" стартавала ў 1995 годзе, яна была арганізавана Міністэрствам адукацыі па ініцыятыве кіраўніка дзяржавы. На гэты раз яна праходзіць па 15 студзеня 2025 года.

24 снежня 2024, Мінск
БЕЛТА