Пра сітуацыю на валютным рынку Беларусі паведаміла 6 кастрычніка Аляксандру Лукашэнку старшыня праўлення Нацыянальнага банка Надзея Ермакова, інфармуе прэс-служба прэзідэнта.
У цэлым, паводле слоў Ермаковай, сітуацыя застаецца стабільнай. "Дадатковая сесія Беларускай валютна-фондавай біржы працуе, працуе наяўны рынак. Якіхсьці перашкодаў або затрымак у прынцыпе няма. Адзінае, хацелася б, каб на рынак ішло больш прапаноў, а пакуль прадпрыемствы ўсё-такі, напэўна, асцярожнічаюць", — сказала старшыня праўлення Нацбанка.
Надзея Ермакова зазначыла, што "не аказваецца якога-небудзь адміністрацыйнага ціску або рэгулявання з боку Нацыянальнага банка на пазабіржавы рынак. Курс беларускага рубля ўстанаўліваецца рыначнымі механізмамі, змяняючыся нязначна".
Для ўстанаўлення стабільнага курсу беларускага рубля, мяркуе Нацбанк, неабходны нейкі час. Ад далейшага попыту і прапановы на валюту будзе залежаць і тое, калі адновіцца адзіны афіцыйны курс.
Кіраўнік дзяржавы запатрабаваў ад Нацыянальнага банка безумоўна забяспечыць выкананне задач, пастаўленых на нарадзе ў канцы жніўня па актуальных пытаннях сацыяльна-эканамічнага развіцця краіны.
Аляксей Арэшка,
БелаПАНМінск, 6 кастрычніка 2011
