Арганізатарамі праекта выступілі Беларускі дзіцячы фонд і кампанія velcom пры падтрымцы Магілёўскага аблвыканкама.

Урачы абследавалі ў Магілёўскай вобласці ўжо больш за 11 тыс. сельскіх дзяцей, паведаміла прэс-служба мабільнага аператара. Як аказалася, дрэнна бачыць кожны чацвёрты. Маштаб праблемы залежыць ад раёна: у адным зрок зніжаны ў 13% дзяцей, а ў іншым — у паловы школьнікаў.

Як расказала каардынатар праекта "Я бачу!", урач-афтальмолаг Магілёўскай абласной дзіцячай бальніцы Марыя Мурашка, сярод асноўных паталогій — парушэнне рэфракцыі, міяпія, гіперметрапія, астыгматызм, радзей сустракаецца кан`юктывіт. Палова сельскіх дзяцей са зніжанай вастрынёй зроку мае патрэбу ў акулярах.

Агляды будуць працягвацца да канца снежня і ахопяць у агульнай складанасці 19 раёнаў вобласці.

Праект "Я бачу!" закліканы зрабіць афтальмалагічную дапамогу даступнай для сельскіх школьнікаў. Магілёўская вобласць была абраная ў якасці пілотнай. Услед за ёй у 2017 годзе мабільныя афтальмолагі будуць працаваць у Гомельскім рэгіёне. Праект падтрымаў 11-кратны паралімпійскі чэмпіён Ігар Бокій, які выступае сярод атлетаў з парушэннямі зроку.

Сродкі на рэалізацыю праекта будуць сабраныя падчас дабрачыннай каляднай акцыі velcom "Рабіць дабро так проста", якая пройдзе па ўсёй Беларусі з 19 па 31 снежня. Са свайго прыбытку з кожнага прададзенага за гэты перыяд смартфона або планшэта velcom пералічыць 5 рублёў Беларускаму дзіцячаму фонду. Гэта дазволіць пакрыць усе выдаткі, звязаныя з працай выязной брыгады дзіцячых афтальмолагаў у сельскай мясцовасці. Для дабрачыннага праекта будзе абсталяваны спецыяльны мікрааўтобус і закуплена мабільнае абсталяванне, у тым ліку рэфрактометр.

У канцы 2015 года ў каляднай акцыі velcom "Рабіць дабро так проста" ўзяло ўдзел 36 тыс. чалавек. У выніку было сабрана больш за 1,8 млрд недэнамінаваных рублёў, якія пайшлі на рэалізацыю магілёўскага этапу сацыяльнага праекта "Я бачу!".

Марына Носава, БелаПАН
Мінск, 18 снежня 2016