Адна з сур`ёзных праблем на шляху сацыяльна-эканамічных пераўтварэнняў - нарастаючы працэс старэння насельніцтва, які вядзе да павелічэння дэмаграфічнай нагрузкі - з 705 непрацаздольных на 1 тыс. насельніцтва чалавек у 2015 годзе да 907 у 2030-м, сказала Ларыса Бельская. "З улікам гэтай перспектывы нараўне з падтрыманнем стабільнай, фінансава-ўстойлівай пенсійнай сістэмы і стварэннем умоў для якаснага жыцця ў пажылым узросце, павышэннем якасці і даступнасці медыцынскіх паслуг, сацыяльнага абслугоўвання ўрад плануе распрацаваць і ажыццяўляць меры па пашырэнні ўдзелу пажылых людзей у грамадскім жыцці, павышэнні іх запатрабаванасці на рынку працы", - праінфармавала яна. Беларускія ўлады плануюць дабівацца павышэння камп`ютарнай дасведчанасці сярод катэгорый насельніцтва ўсіх узростаў і свабоднага доступу да інфармацыйна-камунікацыйных тэхналогій.

Дэлегаты Трэцяга камітэта Генасамблеі ААН абмеркавалі пытанні сацыяльнага развіцця. Трэці камітэт - адзін з шасці галоўных камітэтаў Генеральнай Асамблеі ААН. Яго дэлегаты разглядаюць сацыяльныя і гуманітарныя пытанні, у тым ліку праблематыку абароны правоў чалавека.

Многія важныя пытанні, якія ляжаць у аснове дзейнасці ААН, вырашаюцца прадстаўнікамі ўсіх дзяржаў-членаў у рамках шасці камітэтаў Генеральнай асамблеі ААН. Першы - абмяркоўвае пытанні, што датычацца міжнароднай бяспекі і раззбраення. Другі - сканцэнтраваны на эканамічных і фінансавых праблемах. Трэці - займаецца пытаннямі сацыяльнага развіцця, правоў чалавека, барацьбы са злачыннасцю і пытаннямі, звязанымі з развіццём міжкультурнага супрацоўніцтва. Да ведання Чацвёртага камітэта аднесены спецыяльныя палітычныя пытанні, праблематыка інфармацыі і пытанні дэкаланізацыі. Пяты - рыхтуе праекты рашэнняў Асамблеі па адміністрацыйных пытаннях і пытаннях бюджэту ААН. Шостаму камітэту даручаны юрыдычныя пытанні.

Усе прынятыя ў камітэтах рэзалюцыі і рашэнні перадаюцца на зацвярджэнне пленума Генеральнай асамблеі ААН.

8 кастрычніка 2015, Мінск
БЕЛТА