Шасцідзесяці сямі работнікам арганізацый навукі, адукацыі, аховы здароўя, культуры выдзеленыя штомесячныя гранты прэзідэнта на 2015 год.

У галіне навукі гранты выдзеленыя 28 дактарам і кандыдатам навук. Гранты вучоных будуць накіраваныя на навуковыя даследаванні па розных кірунках, у прыватнасці хімічныя тэхналогіі і матэрыялы, энергабяспеку, энергаэфектыўнасць і энергазберажэнне, атамную энергетыку, нанаматэрыялы і іншыя.

У галіне адукацыі гранты дадзеныя 14 кіраўнікам і спецыялістам устаноў адукацыі, што маюць вучэбна-метадычныя распрацоўкі, вынікі якіх укаранёныя ў вучэбны працэс. 

У галіне аховы здароўя гранты выдзеленыя 15 спецыялістам на навуковыя распрацоўкі ў галіне анкалогіі, транспланталогіі, кардыялогіі і кардыяхірургіі, педыятрыі, алергалогіі, неўралогіі і нейрахірургіі, хірургіі і траўматалогіі, на павышэнне эфектыўнасці супрацьэпідэмічных мерапрыемстваў, зніжэнне частаты ўнутрыбальнічных інфекцый.

У сферы культуры адзначаныя 10 спецыялістаў, якія зрабілі значны ўнёсак у развіццё культуры. Гранты будуць накіраваныя "на рэалізацыю культурных праектаў, што садзейнічаюць захаванню нацыянальных традыцый і прагрэсіўнаму развіццю беларускай культуры".

Аляксей Арэшка, БелаПАН
Мінск, 19 студзеня 2015