Міністэрства інфармацыі Беларусі прааналізуе рэакцыю некаторых беларускіх СМІ на тэракт у рэдакцыі Charlie Hebdo і, у прыватнасці, публікацыю імі карыкатур французскага штотыднёвіка ў знак салідарнасці з загінулымі карыкатурыстамі. 

"Зараз мы будзем аналізаваць рэакцыю асобных нашых сродкаў масавай інфармацыі. У знак салідарнасці пэўныя СМІ таксама апублікавалі карыкатуры. А ці трэба было? Якія карыкатуры? Думаю, павінна быць грамадская ацэнка, грамадская ганьбаванне. Трэба ўсю ўладу выкарыстоўваць, каб не дапускаць тэрарызму ў якой бы там ні было краіне", — сказала Ананіч. 

"Мы смуткуем па загінулых, мы супраць тэрактаў. Але мы ўсе павінны думаць пра тое, як адгукнецца наша слова", — дадала міністр. "Калі забіваюць людзей — гэта недапушчальна. І ўсё роўна, якімі матывамі кіраваліся тэрарысты. Недапушчальны тэрарызм. Але я заўсёды аналізую, што стала прычынай", — падкрэсліла Ананіч. 

Яна адзначыла, што не мела магчымасці сачыць за "творчай дзейнасцю французскага штотыднёвіка". "Але думаю, што імкненне хадзіць па лязе нажа там прысутнічала. Як паказала практыка, гэта скончылася пэўнай чалавечай трагедыяй", — сказала Ананіч. 

У сувязі з гэтым кіраўнік Мінінфарма нагадала, што ў 2005—2006 гадах адно з беларускіх СМІ апублікавала карыкатуры на прарока Мухамеда. "І была вельмі жорсткая адэкватная рэакцыя дзяржавы. Яна была непапулярная ў пэўным асяроддзі, адказны за такую публікацыю быў пакараны. Рашэнне суда — тры гады пазбаўлення волі, якія на практыцы выліліся ў тры месяцы. Гэта жорстка. Але, з іншага боку, дзяржава павінна спыняць у самым зародку праявы экстрэмізму", — заявіла Ананіч. 

Гаворка ідзе аб перадруку недзяржаўнай газетай "Згода" карыкатур на прарока Мухамеда з дацкага выдання Jullands-Posten. У студзені 2008 года Мінгарсуд абвінаваціў выпускаючага рэдактара "Згоды" Аляксандра Здвіжкова ў распальванні рэлігійнай варожасці і прыгаварыў яго да трох гадоў пазбаўлення волі ў калоніі ўзмоцненага рэжыму. 

Таццяна Каравянкова, БелаПАН
Мінск, 19 студзеня 2015