Пяцьдзясят юнакоў і дзяўчат з ліку адоранай моладзі — лаўрэаты і пераможцы абласных, рэспубліканскіх і міжнародных конкурсаў, прадметных алімпіяд, спартыўных спаборніцтваў, актывісты — сталі ўдзельнікамі традыцыйнага навагодняга балю з удзелам губернатара.

— Вы найлепшыя з лепшых, вамі ганарацца вашы бацькі, сёстры, браты, сябры — уся вобласць. Гэта вашы першыя перамогі, і хацелася б, каб вы памяталі, што вы самі камандзіры свайго карабля, і цвёрда трымалі штурвал у сваіх руках, — звярнуўся да маладых людзей старшыня Магілёўскага аблвыканкама Леанід Заяц. 

У рамках свята адбыліся розыгрыш навагодняй латарэі і ўручэнне салодкіх падарункаў ад Дзеда Мароза і Снягуркі.

Падобны баль адбыўся і ў бабруйскім Палацы мастацтваў. У ім узяло ўдзел 130 юнакоў і дзяўчат. Старшыня Бабруйскага гарвыканкама Аляксандр Студнеў павіншаваў іх са святам і таксама ўручыў салодкія падарункі.

А за некалькі дзён да святочных баляў у Магілёве заззялі агні на галоўнай абласной ёлцы. У гуляннях бралі ўдзел магілёўскія Дзяды Марозы, а галоўны з іх пад гукі верталёта спусціўся з даху Дома Саветаў. Планавалася, што будзе сапраўдны верталёт, але з-за "нялётных" умоў надвор`я ад гэтага давялося адмовіцца. Тым не менш свята ўдалося.

На плошчы Дома Саветаў, дзе быў дадзены старт навагоднім мерапрыемствам, сабралася вялікая колькасць дарослых і юных магілёўцаў. Яны падпявалі артыстам, танцавалі і фатаграфаваліся на памяць.

Нэлі Зігуля
Звязда, 17 снежня 2019