Надвор’е, якое рэзка змяняецца, прымушае лесаводаў спяшацца. Дождж — на карысць будучаму лесу.

Як адзначылі ў профільным міністэрстве, план вясновых лесакультурных работ выкананы ўжо на 20 %. На бураломных участках сёлета трэба будзе аднавіць больш за 6,8 тысячы гектараў лесу, у тым ліку 5,6 тысячы гектараў — у Гомельскай вобласці.

Нагадаем, гэтымі днямі ў краіне праходзіць добраахвотная грамадская акцыя «Дай лесу новае жыццё!». Дапамагчы лясгасам у аднаўленні зялёных масіваў могуць усе ахвотныя. Але асабліва дапамозе валанцёраў будуць рады ў Гомельскай і Магілёўскай абласцях, найбольш моцна пацярпелых ад удару стыхіі ў ліпені мінулага года.

Каб стаць удзельнікам акцыі, дастаткова звярнуцца ў лясгас або лясніцтва і паведаміць пра сваё жаданне.

Звязда, 24 сакавіка 2025