Мужчына расказаў, што пад Мінскам да яго ў машыну падсеў знаёмы і пачаў патрабаваць вярнуць грошы, якія заяўнік нібыта яму павінен вярнуць. Пагражаючы пісталетам, ён забраў 200 долараў і 250 рублёў. 

Як паведамляе УУС Мінскага аблвыканкама, гэтага падалося мала, і зламыснік разам з ахвярай паехалі ў Салігорск, дзе пацярпелы вядзе бізнес. Там ён перавёў падазраванаму яшчэ 4,2 тысячы рублёў.

Супрацоўнікі крымінальнага вышуку Міншчыны пры сілавой падтрымцы АМАПа затрымалі падазраванага ў сталіцы па месцы жыхарства. Ім аказаўся раней судзімы за крадзеж 60-гадовы іншаземец. Сышчыкі таксама знайшлі і канфіскавалі пісталет з шасцю патронамі, ад якога затрыманы спрабаваў пазбавіцца.

Следчымі заведзена крымінальная справа за разбой. Санкцыя артыкула прадугледжвае да дзесяці гадоў пазбаўлення волі.

Сяргей Расолька
Звязда, 30 жніўня 2023