Здабыча нафты ў Беларусі выйшла на траекторыю росту, заявіў генеральны дырэктар ВА "Беларуснафта" Аляксандр Ляхаў.
Паводле яго слоў, сёлета плануецца здабыць 1 млн 930 тыс тон чорнага золата. За восем месяцаў 2024 года ўжо атрымана 1 млн 278 тыс тон сыравіны.
"Па выніках наступнага года плануем здабыць не менш за два млн тон нафты – столькі здабывалі больш за 30 гадоў таму", - цытуе Ляхава прэс-служба прадпрыемства.
Гендырэктар звярнуў увагу, што ў рэспубліцы здабыча нафты будзе расці дзякуючы новым тэхналогіям, у тым ліку пры рабоце з запасамі, якія цяжка вымаюцца.
"Структура здабычы складаецца з пераходнага фонду свідравін, здабыча ідзе таксама за кошт правядзення геолага-тэхнічных мерапрыемстваў, дзе ў нас таксама перавыкананне планавых заданняў", - удакладніў ён.
Ляхаў разлічвае, што "Беларуснафце" ўдасца па выніках года перавыканаць планавыя паказчыкі, а аб’ёмы здабычы з новых свідравін і бакавых ствалоў павінны стаць рэкорднымі.
