Паводле інфармацыі аператыўнікаў, мужчына пражываў у інтэрнаце і працаваў на адным з прадпрыемстваў горада. З мэтай падпрацоўкі ўладкаваўся ў інтэрнэт-краму па продажы наркотыкаў. Набываючы буйныя партыі забароненых рэчываў, наркакур`ер фасаваў іх на дробныя дозы і з дапамогай закладак распаўсюджваў у розных раёнах сталіцы. ГУУС Мінгарвыканкама паведамляе цікавую дэталь: характэрна, што затрыманы абгортваў тавар у ізастужку з лагатыпам арганізацыі, у якой працаваў.

Устаноўлена, што апошнія паўгода мужчына прадаваў метадон, мефедрон і гашыш сваім знаёмым з рук у рукі.

У ходзе затрымання праваахоўнікі выявілі ў мужчыны больш за 25 грамаў метадону і электронныя вагі. Таксама ў тэлефоне ў мужчыны былі выяўленыя фатаграфіі мясцовасці, дзе захоўвалася каля 140 закладак.

Вядома, што раней затрыманы прыцягваўся да крымінальнай адказнасці за незаконны абарот наркотыкаў.

Сяргей Расолька
Звязда, 20 лістапада 2020