Мэта праекта - даць магчымасць бясплатнага навучання дзяўчатам ва ўзросце ад 15 да 25 гадоў з наступным развіццём кар`еры ў IТ-сферы. Заяўку на навучанне могуць падаць школьніцы старэйшых класаў, якія плануюць звязаць сваё жыццё з IТ, студэнткі ВНУ любога профілю, акрамя тых, хто ўжо навучаецца па спецыяльнасцях, звязаных з праграмаваннем. У фокусе таксама маладыя жанчыны, якія жадаюць прайсці курс навучання навыкам ў IТ, у якіх не павінна быць вопыту работы ў гэтай сферы.

"У цэлым узровень кампетэнцый ў дадзеным выпадку не важны. Веданне англійскай мовы таксама не з`яўляецца абавязковым, але істотна палегчыць атрыманне навыкаў у праграме, - сказала Вікторыя Радчук. - Усе дзяўчаты пройдуць тэставанне пад кіраўніцтвам кваліфікаваных HR-спецыялістаў, каб вызначыць іх схільнасць да IТ. Выпрабаванні запланаваны на 26 і 27 красавіка".

З суіскальніц плануецца набраць чатыры рознаўзроўневыя групы па 15 чалавек. Праграма навучання ўключае ў сябе асновы праграмавання для пачаткоўцаў, а таксама мовы праграмавання для тых, хто ўжо "ў тэме". Заняткі будуць весці выкладчыкі Брэсцкага тэхнічнага ўніверсітэта і працуючыя ў ІТ-сферы спецыялісты. Чакаецца, што навучанне пачнецца адразу пасля вялікіх майскіх святаў. Заняткі будуць праходзіць два разы на тыдзень на працягу чатырох месяцаў на базе мясцовага фонду рэгіянальнага развіцця.

"Брэсцкі аблвыканкам падтрымлівае нас інвестыцыямі. У мінулым годзе фонду былі вылучаныя грошы на набыццё мэблі, камп`ютараў, абсталявання. Цяпер у нас ёсць цэлы навучальны клас", - адзначыла менеджэр праекта. Таксама на працягу ўсяго перыяду навучання для слухачак курсаў будуць арганізаваны стажыроўкі на IТ-прадпрыемствах.

БЕЛТА, 24 красавіка 2019