Турніры лучнікаў, бугурты, конныя спаборніцтвы, сярэднявечная музыка і магчымасць апынуцца каля сценаў легендарнага Гальшанскага замка выпадае беларусам якраз 21 жніўня. Менавіта ў гэты дзень адбудзецца чарговы фестываль сярэднявечча "Гальшанскі Замак-2010".
Сёлетні фестываль адметны пяццю "круглымі" датамі. Гэта і 400-годдзе заснавання Гальшанскага замка, 730-годдзе заснавання Гальшанаў, 605-годдзе з дня нараджэння Соф`і Гальшанскай (пачынальніцы роду Ягелонаў). Ну і, вядома ж, 600-годдзе Грунвальдскай бітвы.
У гасцей фестывалю будзе магчымасць не толькі паглядзець на турніры і бугурты, а таксама паласавацца сярэднявечнымі стравамі, прымераць на сябе рыцарскія даспехі, паўдзельнічаць у княжаскіх забаўках. На фэсце чакаюцца таксама і гурты "Стары Ольса", "ЛітвінТроль", "Тэстамэнтум Тэррэ", "Расалія", "Келіх Кола", "Гальярда", і іншыя). А на салодкае — фаер-шоу ад тэатраў "Гістрыён" і "Дэ-Грыза".
— Гэтыя фестывалі паказалі, што людзям цікавая гісторыя сваёй краіны, свая спадчына. Попыт ёсць, і кожны год прыязджае шмат людзей. Гэта не толькі магчымасць глыбей пазнаёміцца са сваёй культурай, але і добрая нагода пабываць больш часу са сваёй сям`ёй і дзецьмі, — расказвае Алесь Кушнер, супрацоўнік турыстычнага агенцтва "Гісторыя Тур", асноўнага арганізатара свята. — Такімі фестывалямі мы таксама хочам прыцягнуць увагу да стану і самога Гальшанскага замка. Таму што цяпер, наколькі мне вядома, ніякай рэканструкцыі не плануецца. Гаворка ідзе пра тое, каб хоць замарозіць тое, што засталося.
Пачатак фестывалю ў 11.00. Кошт квіткоў — 25 тыс. рублёў.
Настасся Занько
Звязда11.08.2010
Пяць рэчаў, якія варта ведаць пра Гальшанскі замак:1. У ХІІІ стагоддзі замак быў драўляны і стаяў па-над высокай самароднай гарой Карабель.
2. Князі Гальшанскія валодалі замкам да 1525 г., а потым, пасля шлюбу князёўны Алены Гальшанскай з Паўлам Сапегам, ён перайшоў ва ўладанні Сапегаў.
3. Мураваным замак стаў у ХVІІ стагоддзі.
4. Пры Сапегах у замку была вялікая бібліятэка і тры штучныя возеры.
5. У Галандыі і Польшчы ёсць падобныя замкі.
