Каля 60 тысяч наведвальнікаў чакаецца на 31-й Мінскай міжнароднай кніжнай выставе-кірмашы, паведамілі арганізатары на прэс-канферэнцыі.
Як расказаў намеснік міністра інфармацыі Беларусі Ігар Бузоўскі, сёлета пляцоўка мерапрыемства будзе шырока прадстаўлена краінамі блізкага і далёкага замежжа.
"Для нас гэта вельмі адказна і прынцыпова ў сувязі з вядомымі пэўнымі геапалітычнымі падзеямі, працэсамі, якія адбываюцца ў свеце, пераацэнкай каштоўнасцей, якую мы ўсё назіраем, і якая апісваецца ў тым ліку пісьменнікамі", - заявіў ён.
Арганізатары чакаюць удзел у выставе-кірмашы прадстаўнікоў каля 20 краін – Ірана, Егіпта, Расіі, Кітая і іншых дзяржаў. Плануецца, што ў Мінск прыедуць у тым ліку госці з Еўрасаюза.
"Не буду апярэджваць падзеі, але плануецца ў нас Германія, плануюцца, магчыма, прадстаўнікі ад Польшчы. Магчыма, яны будуць на нашых стэндах працаваць. З улікам падзей, якія зараз адбываюцца, мы не будзем апярэджваць іх афіцыйны ўдзел. Тыя арганізацыі і выдавецтвы (з ЕС), якія з намі супрацоўнічаюць, прама скажу, як ёсць, асцерагаюцца за тое, ці змогуць яны ў далейшым працаваць на тэрыторыі сваіх краін", - адзначыў Бузоўскі.
Тэматыка выставы – Год якасці і 80-годдзе вызвалення Беларусі. Аднак, як заяўляюць арганізатары, сыходзіць у чыстым выглядзе ў "ваеншчыну" не плануецца.
Мінскі міжнародны кніжны форум адбудзецца з 14 па 17 сакавіка ў "Рамонку" – адміністрацыйным комплексе па праспекце Пераможцаў, 14. Уваход бясплатны.
Арганізатары прагназуюць, што за чатыры дні працы выставы яе наведаюць каля 60 тыс чалавек.
