Каментуючы заявы ІП, якія гандлююць легпрамам, аб немагчымасці працаваць з-за ўказа № 222, Лукашэнка падкрэсліў: "З 1 студзеня скончыліся іх мядовыя гады, і трэба працаваць у роўных умовах, згодна з адпаведнымі дакументах". "Ім трэба разумець, што сертыфікацыя прадукцыі, на якую мы пайшлі, — гэта першы крок. Ёсць тавар — усё суправаджальныя дакументы павінны быць. Мы павінны празрыста гандляваць, і хопіць вакол гэтага нейкія падкопы ладзіць", — цытуе кіраўніка дзяржавы інфармагенцтва БелТА.

Лукашэнка нагадаў пра сваю сустрэчу з прадпрымальнікамі ў ГЦ "Экспабел" 17 сакавіка мінулага года, на якой было прынятае рашэнне аб працягу тэрмінаў рэалізацыі несертыфікаваных рэшткаў прадукцыі легпрама, а таксама выказаў здзіўленне тым, што зараз "яго падштурхоўваюць да нейкіх рашэнняў".

На гэтым тыдні адміністрацыі раёнаў Мінска праводзяць сустрэчы з ІП, якія гандлююць легпрамам, паведамляе грамадскае аб`яднанне прадпрымальнікаў "Перспектыва".

У прыватнасці на Чэрвеньскім рынку 13 студзеня адбыўся сход прадпрымальнікаў Ленінскага раёна, прысвечаны ўмовам працы ў новым годзе. Як паведаміў член савета прадпрымальнікаў рынку актывіст "Перспектывы" Васіль Бараноўскі, у сустрэчы ўзялі ўдзел намеснік начальніка ўпраўлення арганізацыі гандлю і паслуг Мінгандлю Андрэй Мяшкоў, начальнік аддзела прадпрымальніцтва камітэта эканомікі Мінгарвыканкама Вольга Лявошка і прадстаўнікі Дзяржстандарта, адміністрацыі раёна. Паводле слоў Бараноўскага, прадстаўнікі ўлады выслухалі меркаванне прадпрымальнікаў, якія распавялі пра свае праблемы, звязаныя з выкананнем указа № 222. Акрамя таго, на сустрэчы абмяркоўваліся прапановы Мінгандлю аб працягу тэрмінаў абавязковай ўстаноўкі ІП плацежных тэрміналаў і аб магчымасці ўстаноўкі аднаго тэрмінала на некалькі чалавек.

Нагадаем, з 1 студзеня 2016 года ў Беларусі дзейнічае ўказ прэзідэнта № 222 "Аб рэгуляванні прадпрымальніцкай дзейнасці і рэалізацыі тавараў індывідуальнымі прадпрымальнікамі і іншымі фізічнымі асобамі". Згодна з указам ІП павінны рэалізоўваць прадукцыю легпрама, увезеную з краін Мытнага саюза, толькі з суправаджальнымі дакументамі. Аднак расійскія пастаўшчыкі, у якіх закупляюць тавар большасць беларускіх ІП, як правіла, адмаўляюцца выдаваць дакументы аб паходжанні прадукцыі альбо даюць фіктыўныя даведкі. У выніку індывідуальных прадпрымальнікаў штрафуюць, у іх канфіскуюць тавар.

Паколькі неаднаразовыя просьбы прадпрымальнікаў да ўладаў адмяніць указ пачутыя не былі, з пачатку новага года ў Мінску і іншых гарадах Беларусі многія рынкі і гандлёвыя цэнтры былі практычна пустымі — пераважная большасць ІП прыпынілі працу з-за немагчымасці выконваць патрабаванні ўказа.

11 студзеня ў Мінску адбыўся антыкрызісны форум прадпрымальнікаў, удзельнікі якога дамовіліся не выходзіць на працу да 25 студзеня. Яны запатрабавалі вырашыць праблемы, звязаныя з дзеяннем указа № 222, на ўзроўні ўрада і прэзідэнта.

Падчас форуму прадстаўнік Мінгандлю Андрэй Мяшкоў паведаміў, што сітуацыя з ІП будзе разгледжаная на ўзроўні ўрада да канца гэтага тыдня.

Аляксей Аляксандраў, БелаПАН
Мінск, 14 студзеня 2016