Кіраўнік дзяржавы пракаменціраваў нагнятанне сітуацыі вакол індывідуальных прадпрымальнікаў у сувязі з тым, што "з 1 студзеня скончыліся іх мядовыя гады і трэба працаваць у роўных умовах, па адпаведных дакументах".

"Ім трэба разумець, што сертыфікацыя прадукцыі, на якую мы пайшлі, - гэта першы крок. Ёсць тавар - усе суправаджальныя дакументы павінны быць. Мы павінны празрыста гандляваць, і хопіць вакол гэтага нейкія падкопы рабіць", - падкрэсліў Аляксандр Лукашэнка.

У мінулым годзе Прэзідэнт сустракаўся з індывідуальнымі прадпрымальнікамі. І тады было прынята рашэнне, што з 1 студзеня 2016 года ўсе індывідуальныя прадпрымальнікі - плацельшчыкі адзінага падатку павінны будуць мець на тавары легпрама дакументы, якія пацвярджаюць іх набыццё.

Аляксандр Лукашэнка нагадаў аб дасягнутых у час той сустрэчы дамоўленасцях і выказаў недаўменне, што цяпер яго падштурхоўваюць да нейкіх рашэнняў.

14 студзеня 2016, Мінск
Святлана Саўко - БЕЛТА