Камітэт дзяржаўнага кантролю прапануе ўвесці ў Беларусі дыферэнцыраваныя стаўкі акцызу на піва. З такой ініцыятывай выступіў старшыня КДК Аляксандр Якабсон 10 красавіка на нарадзе ў Прэзідэнта аб стане і перспектывах развіцця піваварнай галіны.
Аляксандр Якабсон агучыў некалькі прапаноў па паляпшэнні сітуацыі ў піваварнай галіне. Так, у прыватнасці, ён лічыць неабходным зацвердзіць гранічныя мінімальныя рознічныя цэны на піва па аналогіі з гарэлкай, з тым каб не дапусціць дэмпінгу цэн з боку міжнародных карпарацый.
Акрамя таго, ён лічыць неабходным вызначаць памеры ставак акцызнага падатку на піва з улікам аптымальных яго суадносін з акцызам на алкагольныя напіткі. Мэта такога рашэння - стымуляванне вытворчасці і спажывання піва адносна моцных спіртных напіткаў.
На яго думку, трэба ўстанавіць дыферэнцыраваныя стаўкі акцызу на піва, прадаставіўшы найбольшыя прэферэнцыі піву з меншай колькасцю абсалютнага алкаголю. Такім чынам, будзе забяспечана ўстойлівае фінансавае становішча піўзаводаў, якія вырабляюць гэты асартымент піва, а таксама знізіцца спажыванне абсалютнага алкаголю ў краіне.
Аляксандр Якабсон таксама лічыць, што неабходна наладзіць арганізацыю работы дылерска-лагістычнай сістэмы па папулярызацыі айчыннага піва на ўнутраным рынку такім чынам, каб як мінімум у кожным гандлёвым аб`екце, асабліва грамадскага харчавання, у продажы пастаянна было піва ўсіх беларускіх вытворцаў. Паводле яго слоў, праверкі КДК паказваюць, што гэта, хутчэй, выключэнне з правіл.
Акрамя таго, патрэбны ўвядзенне ў вытворча-збытавы працэс маркетынгавай палітыкі, якая адпавядае строгім умовам рынку, умацаванне кадравага патэнцыялу прадпрыемстваў адукаванымі смелымі маладымі маркетолагамі, практыка падрыхтоўкі эксклюзіўных спецыялістаў за мяжой.
Старшыня КДК лічыць неабходным прапрацаваць з замежнымі кампаніямі Бельгіі, Нідэрландаў, Вялікабрытаніі, Даніі і Фінляндыі магчымыя варыянты размяшчэння кантрактнай ліцэнзійнай вытворчасці піва на беларускіх заводах і надаць імпартазамяшчальную дынаміку ў гэтай справе.
Сярод прапаноў Аляксандр Якабсон адзначыў забарону рэалізацыі на тэрыторыі краіны піва, разлітага ў ПЭТ-бутэлькі ёмістасцю ад 1,5 л і вышэйшай, неабходнасць загрузкі экспартнымі абавязацельствамі замежныя кампаніі, якія працуюць у Беларусі, праз адпаведныя дагаворы, забеспячэння пастаяннага і строгага кантролю за абаротам імпартнага піва ў частцы выканання патрабаванняў нацыянальных тэхнічных нарматыўных прававых актаў, а таксама тэхнічных рэгламентаў МС на гэту прадукцыю, уключаючы маркіроўку, упакоўку, якасць і іншыя характарыстыкі, а таксама стварэння эканамічных умоў для развіцця ў краіне дробных вытворчасцей піва.
11 красавіка 2014, Мінск
БЕЛТА
