Разам з арганам пад скляпеннямі сабора ў Полацку будуць гучаць саксафон, блокфлейта, гістарычны кларнет 1800 года, шалюмо (драўляны духавы інструмент эпохі Сярэднявечча і Барока, папярэднік кларнета) і камерны аркестр.

Фестывальная палітра сёлетняга музычнага форуму багатая на новыя імёны. Разам з ужо знаёмымі полацкім слухачам арганістамі, такімі як Крыстаф Хаўзер (Германія) і Ханс Хрысціян Хейн (Данія), у фестывалі ўпершыню выступяць выдатныя еўрапейскія выканаўцы Марак Стафаньскі (Польшча), Валерыя Балахоўская (Украіна), Элізабет Завадке (Швейцарыя), Фларыян Хок (Германія), Рэгіна Каменшчыкова (Расія).

Адбудзецца юбілейны канцэрт Ксеніі Пагарэлай, прысвечаны 25-годдзю творчай дзейнасці ў канцэртнай зале Сафійскага сабора. Арганістка выступіць разам з камерным аркестрам "Еўропа-Цэнтр" пад кіраўніцтвам Раіля Садыкава.

Адзіны ў Беларусі арганны фестываль ужо шмат гадоў збірае ў Полацку сусветна вядомых музыкантаў і іх паклоннікаў. У яго гісторыі больш як 100 канцэртаў, на якіх пабывалі амаль 20 тыс. слухачоў, у тым ліку з іншых гарадоў Беларусі і рэгіёнаў Расіі.

XVIII Міжнародны фестываль арганнай музыкі "Званы Сафіі" пройдзе ў Полацку з 3 лістапада па 8 снежня.

Сафійскі сабор як музей гісторыі архітэктуры і канцэртная зала ўваходзіць у склад Нацыянальнага Полацкага гісторыка-культурнага музея-запаведніка. Гэта помнік архітэктуры сярэдзіны ХІ - сярэдзіны XVIII стагоддзя. Музей адкрыты для наведванняў з 1987 года. Яго экспанаты расказваюць аб гісторыі архітэктуры самага старажытнага каменнага будынка на тэрыторыі сучаснай Беларусі, шматлікіх перабудовах, рамонтах і апошняй рэстаўрацыі помніка. У Сафійскім саборы можна ўбачыць фрагменты кладкі ХІ стагоддзя, старажытны падмурак, які практычна поўнасцю захаваўся, а таксама фрэскавыя роспісы канца ХІ стагоддзя.

Канцэртная зала ў Сафійскім саборы дзейнічае з 1983 года. Тут кожны год праходзіць Міжнародны фестываль старадаўняй і сучаснай камернай музыкі і міжнародны фестываль арганнай музыкі "Званы Сафіі".

15 кастрычніка 2013, Віцебск
Алена Ціханава - БЕЛТА