На будынку Мінскага гарадскога цэнтра алімпійскага рэзерву па барацьбе імя Аляксандра Мядзведзя ўстанавілі памятную дошку са скульптурным партрэтам Кастуся Каліноўскага і яго кароткай біяграфіяй.
Зрабілі гэта яшчэ ў сярэдзіне ліпеня без асаблівых урачыстасцяў.
Гэтая дошка з 1988 года па 1998-ы вісела на будынку кінатэатра "Вільнюс", што па вуліцы Каліноўскага, 55, але потым знікла.
Пасля яе адшукалі і перадалі на захаванне і аднаўленне ў Першамайскае ЖРЭА, таму што будынак быў на рэканструкцыі. Кінатэатр "Вільнюс" пасля рэканструкцыі стаў Палацам барацьбы.
Нядаўна маладзёжная арганізацыя "Альтэрнатыва" правяла кампанію за ўстанаўленне помніка Кастусю Каліноўскаму на названай у яго гонар мінскай вуліцы. Зварот у гарвыканкам быў накіраваны 9 ліпеня. Актывісты даслалі лісты кіраўніку Мінскага гарсавета, міністру культуры, старшыні Мінгарвыканкама. Яны ж і прапанавалі месца будучага помніка: сквер, які пачынаецца з вуліцы Каліноўскага, побач з праспектам Незалежнасці. Паблізу — Усходнія могілкі, дзе пахаваныя дзеячы беларускай культуры, штогод тут праходзіць шэсце ў Курапаты.
Усяго было сабрана 4.000 подпісаў за помнік Каліноўскаму ў Мінску, 3.500 з іх былі пасланыя ўладам.
БелаПАН, 7 жніўня 2013
