Яго арганізатарамі выступілі Магілёўскае гарадское аддзяленне "Рускага таварыства" і Магілёўскае абласное аддзяленне Саюза пісьменнікаў Беларусі пры падтрымцы пасольства РФ, Расійскага цэнтра навукі і культуры (Мінск) і Магілёўскага гарадскога савета ветэранаў.
Як адзначаюць арганізатары конкурсу, яго галоўная мэта — прыцягнуць увагу грамадскасці да падзей Вялікай Айчыннай вайны, абароны Магілёва, а таксама да жыцця і творчасці савецкага паэта, пісьменніка і ваеннага карэспандэнта Канстанціна Сіманава. Акрамя таго, конкурс закліканы падтрымаць творча адораных людзей з Расіі, Беларусі і іншых краін.
Спаборніцтва літаратурных талентаў будзе праходзіць у намінацыях "Малая проза" і "Паэзія". Маладым літаратарам ва ўзросце ад 14 да 18 гадоў прапаноўваецца напісаць сачыненне ў эпісталярным жанры на тэму "Вітаем, Канстанцін Міхайлавіч".
Тэмы для паэтаў і пісьменнікаў старэйшых за 18 гадоў — "Мужнасці храбрых спяваем мы славу" (літаратурныя творы на гэтую тэму павінны быць прысвечаны Канстанціну Сіманаву, гераічнай абароне Магілёва, падзеям лета 1941 года) і "Гэты мір завешчаны табе і мне" (барацьба за мір, сэнс і каштоўнасць чалавечага жыцця).
Прыём конкурсных работ пачаўся 1 жніўня і будзе доўжыцца па 16 лістапада. Вынікі літаратурнага спаборніцтва з уручэннем узнагарод пераможцаў будуць падведзены на Сіманаўскіх чытаннях, якія пройдуць у Магілёве 29 лістапада.
Уладзімір Лапцэвіч,
БелаПАНМагілёў, 10 жніўня 2013
