Тушу лася знайшлі беларускія пагранічнікі каля літоўскай загароды на мяжы, пра гэта паведамілі ў Дзяржпамежкамітэце Беларусі.
Жывёла паспрабавала перайсці на беларускую тэрыторыю, аднак загінула ад парэзаў, атрыманых ад еўрапейскай "спіралі Бруна".
Паводле звестак ведамства, на беларуска-літоўскай мяжы пасля будавання ўладамі Літвы смяротных загарод загінулі ўжо 20 ласёў, 10 казуль і адзін алень.
Усяго з верасня 2021 года беларускім бокам зафіксавана 50 выпадкаў смерці жывёл, якія сталі ахвярамі пагранічнай агароджы Літвы, Латвіі і Польшчы.
Мінск раней неаднаразова казаў аб тым, што загароды, якія ўстанавілі суседнія з Беларуссю краіны на мяжы, парушаюць шляхі міграцыі жывёл і ствараюць перадумовы для памяншэння папуляцыі ваўкоў, рысей, барсукоў, лісіц і зуброў.
Як раней адзначалі ў МЗС Беларусі, неабдуманыя і недальнабачныя дзеянні Польшчы, Літвы і Латвіі ставяць пад пагрозу біяразнастайнасць і ўстойлівае развіццё ўсяго рэгіёна.
У міністэрстве мяркуюць, што калі не распачаць рашучых дзеянняў зараз, то Чырвоная кніга Еўропы ў бліжэйшы час папоўніцца новымі старонкамі.
