Прадстаўнік Беларусі быў вымушаны пакінуць пасяджэнне палітычнага камітэта Парламенцкай асамблеі Савета Еўропы (ПАСЕ) у Страсбургу, на якім разглядалася беларускае пытанне.
Інфармацыя пра скандал у Страсбургу прагучала 4 кастрычніка на брыфінгу ў Міністэрстве замежных спраў Беларусі.
Журналіст ІТАР-ТАСС папрасіў прэс-сакратара МЗС Андрэя Савіных пракаментаваць рашэнні, прынятыя на пасяджэнні паліткамітэта ПАСЕ адносна Беларусі, а таксама скандал з выдварэннем беларускага прадстаўніка з залы пасяджэння.
У адказ Савіных заявіў, што пазіцыя МЗС наконт гэтага будзе абнародавана пазней.
Пасяджэнне паліткамітэта ПАСЕ ўжо завершана, але аб прынятых на ім рашэннях пакуль не паведамляецца.
Нагадаем, парламенцкія выбары, што прайшлі ў Беларусі 23 верасня, ПАСЕ ацаніла як не адпаведныя міжнародным дэмакратычным стандартам.
27 верасня ў межах сесіі Генеральнай асамблеі ААН міністр замежных спраў Беларусі Уладзімір Макей сустрэўся з генсакратаром Савета Еўропы Турб`ёрнам Ягландам. Якія тэмы абмяркоўваліся на сустрэчы, невядома.
Андрэй Серада,
БелаПАНМінск, 4 кастрычніка 2012
