Фінал конкурсу песні "Еўрабачанне-2019" прайшоў вечарам у нядзелю ў Тэль-Авіве. За перамогу ў шоу змагаліся прадстаўнікі 26 краін.

Па выніках галасавання тэлегледачоў і членаў прафесійнага журы пераможцам "Еўрабачання" гэтага года стаў нідэрландзец Дункан Лоўрэнс, які выканаў песню ўласнага сачынення пад назвай Arcade.

Другое месца на конкурсе заняў італьянец Махмуд, трэцяе - расіянін Сяргей Лазараў. Што цікава, на "Еўрабачанні-2016" Лазараў таксама фінішаваў трэцім.

Папярэдні раз Нідэрланды перамагалі на "Еўрабачанні" ў 1975 годзе. Дарэчы, у конкурсе краіна ўдзельнічае з моманту яго заснавання.

У конкурсе песні "Еўрабачанне-2019" удзельнічалі прадстаўнікі 41 краіны свету. Агульная аўдыторыя шоу перавысіла некалькі сотняў мільёнаў чалавек.

Мінск, 19 траўня 2019
Sputnik