Нацыянальная экспазіцыя Рэспублікі Беларусь будзе прадстаўлена на Міжнароднай выстаўцы сельскай гаспадаркі і харчовай прамысловасці Iran Agrofood, якая пройдзе 17-20 чэрвеня ў Тэгеранскім міжнародным выставачным цэнтры. 

Беларускія вытворцы пакажуць самую разнастайную прадукцыю. Так, асартымент тавараў кандытарскай фабрыкі "Віцьба" ўключае больш за 100 найменняў, у тым ліку гэта сухія сняданкі, вафлі і пячэнне. Нацыянальная акадэмія навук Беларусі пакажа інавацыйныя распрацоўкі ў некалькіх галінах. Напрыклад, Навукова-практычны цэнтр НАН Беларусі па жывёлагадоўлі прапануе шэраг ветэрынарных прэпаратаў і біядабавак на аснове наначасціц для сельскагаспадарчых жывёл. Навукова-практычны цэнтр харчавання прадставіць лінейку нізкабялковых прадуктаў з паніжанай колькасцю фенілаланіну. У прыватнасці, Інстытут мясной і малочнай прамысловасці пакажа біякансерванты і новыя віды сухіх дражджэй для харчовай прамысловасці, у тым ліку функцыянальнага прызначэння (нізкабялковыя, спецыяльна распрацаваныя для людзей, якія пакутуюць ад такіх захворванняў, як фенілкетанурыя). Інстытут пладаводства НАН Беларусі гатовы прапанаваць замежным пакупнікам тэхналогіі размнажэння in vitro пладоў, ягад, фундуку і вінаграду. Навукова-практычны цэнтр сельскай гаспадаркі Нацыянальнай акадэміі навук Беларусі прапануе найноўшыя сарты сельскагаспадарчых культур з высокім патэнцыялам прадукцыйнасці і ўраджайнасці.

Беларускі дзяржаўны тэхналагічны ўніверсітэт для гасцей выстаўкі прэзентуе новыя віды мінеральных угнаенняў, тэхналогіі перапрацоўкі сельскагаспадарчых адходаў з атрыманнем будаўнічых і кампазіцыйных матэрыялаў, тэхналогіі перапрацоўкі расліннай сыравіны і лекавых траў з атрыманнем біялагічна актыўных дабавак, новыя метады аналізу якасці лёну і вырабы з лёну.

У ліку таго, што будзе на экспазіцыі - дэзынфіцыруючыя сродкі для сельскагаспадарчых памяшканняў, біяпрэпараты для раслін, ветэрынарныя прэпараты для сельскагаспадарчых і дамашніх жывёл, тэхналогіі вытворчасці харчовай упаковачнай плёнкі, фітасолі і функцыянальныя харчовыя дабаўкі.

15 чэрвеня 2022, Мінск
БЕЛТА