Дональду Трампу кіраўнік беларускай дзяржавы перадаў корцік. Пры гэтым ён нагадаў, што балеў на выбарах менавіта за цяперашняга Прэзідэнта ЗША. "Я "ўмешваўся" ў амерыканскія выбары і балеў за Трампа", - з доляй гумару адзначыў Аляксандр Лукашэнка. У якасці падарунка для Меланіі Трамп былі выбраны вырабы з беларускага лёну - абрус з сурвэткамі.

"Гэта - жаночае, яна мае адносіны да славянскага лёну (жонка Прэзідэнта ЗША нарадзілася ў Славеніі.)", - сказаў кіраўнік дзяржавы.

У ліку падарункаў самому Джону Болтану - шакаладныя ласункі без цукру ў саставе, уключаючы эксклюзіўны набор шакаладу, створаны да II Еўрапейскіх гульняў. Яшчэ адзін падарунак - альбом "Спадчына Беларусі". "Гэта пра Беларусь. Вы ў самалёце пагартаеце і ўбачыце, што такое Беларусь", - растлумачыў беларускі лідар.

"І перадайце свайму Прэзідэнту самыя цёплыя віншаванні ад беларускага народа. Карані яго зяця Кушнера (Джарэд Кушнер.) тут у Беларусі", - дадаў кіраўнік дзяржавы.

29 жніўня 2019, Мінск
БЕЛТА