Міністр замежных спраў Беларусі Уладзімір Макей лічыць, што неабходна адысці ад палітычных інсінуацый наконт будаўніцтва БелАЭС. Міністр перакананы: "Трэба адысці ў бок ад палітычных інсінуацый, садзіцца за стол перагавораў і прадметна, канкрэтна абмяркоўваць усе пытанні, якія выклікаюць заклапочанасць у абодвух бакоў".

Уладзімір Макей падкрэсліў, што істэрыя, якая нагнятаецца цяпер у літоўскім грамадстве наконт будаўніцтва БелАЭС, не садзейнічае добрасуседскім дружалюбным адносінам паміж краінамі. "Фактычна грамадства ўцягваюць у кампанію, істэрыю супраць Беларусі. Навошта гэта рабіць?" - сказаў ён.

Кіраўнік знешнепалітычнага ведамства адзначыў, што Літва і Беларусь маюць агульную гісторыю, развіваюць гандлёва-эканамічныя адносіны. Беларуская прадукцыя транзітам ідзе праз літоўскія парты, забяспечваючы тым самым пэўны ўклад у развіццё літоўскай эканомікі.

27 мая 2016, Мінск
БЕЛТА