Узвядуць завод на ўчастку нумар 12 СЭЗ "Гроднаінвест" у Свіслацкім раёне. Рэалізуе інвестыцыйны праект ТАА "ЭйчЭсБелакон" - даччыная кампанія аўстрыйскай HS Timber Group, адной з вядучых кампаній у сферы дрэваапрацоўкі ў Еўропе.

"Рэалізуем вельмі цікавы праект. Тут добрае месцазнаходжанне з пункту гледжання лагістыкі і прыцягнення рабочай сілы, пераваг свабоднай эканамічнай зоны. У цэлым Беларусь прывабная з эканамічнага пункту гледжання, упэўнены, што праект будзе паспяховым", - сказаў член праўлення HS Timber Group Юрген Бергнер.

Завяршыць будаўніцтва плануецца ў 2022 годзе. Сума інвестыцый складзе каля $84 млн. Тут плануюць перапрацоўваць да 500 тыс. куб.м хвойных парод за год. Асноўная ўвага будзе засяроджана на безадходнай вытворчасці і стварэнні пелет.

"На прадпрыемстве створаць каля 230 рабочых месцаў. Гэта станоўча паўплывае на развіццё рэгіёна. Павялічацца падатковыя паступленні ў бюджэт раёна. Ды і ў цэлым паспяховая рэалізацыя праекта стане добрым прыкладам для іншых інвестараў", - адзначыў старшыня Свіслацкага райвыканкама Аляксандр Вярсоцкі. Ён падкрэсліў, што рэгіён становіцца ўсё больш прывабным для інвестараў з розных сфер. У прыватнасці, плануецца некалькі лагістычных праектаў, вядзецца работа і па іншых напрамках.

Намеснік старшыні Гродзенскага аблвыканкама Віталь Нявера расказаў, што за 9 месяцаў бягучага года ў вобласці прыцягнута $83 млн замежных інвестыцый. Лакаматывамі ў гэтай дзейнасці застаюцца Гродна, Ліда і Смаргонь, аднак добрыя перспектывы праглядаюцца ў Свіслацкага раёна. Ён цікавы перш за ўсё з лагістычнага пункту гледжання - побач граніца з ЕС, а на тэрыторыю раёна заходзіць так званая вузкая еўрапейская чыгуначная каляя.

18 снежня 2020, Свіслач
БЕЛТА