Пасяджэнне рабочай групы высокага ўзроўню, на якім абмяркоўваліся ініцыятывы краін Еўразійскага эканамічнага саюза, накіраваныя на рэалізацыю пераліку мер па павышэнні ўстойлівасці эканомік ЕАЭС, адбылося 14 красавіка ў Маскве. 

Абмеркаванне прайшло напярэдадні пасяджэння Савета ЕЭК. "У прыватнасці, разгледжаны прапановы па зніжэнні ставак увазных мытных пошлін і прадастаўленні тарыфных ільгот на тавары крытычнага імпарту, а таксама ініцыятыва расійскага боку па павелічэнні вартасных і вагавых норм увозу тавараў для асабістага карыстання, - расказалі ў прэс-службе. - Акрамя таго, у цэнтры ўвагі былі абмежавальныя меры, якія ўводзяцца дзяржавамі ў рамках функцыянавання ўнутранага рынку ЕАЭС. Бакі абмеркавалі, якія крокі неабходны для захавання кааперацыйных ланцужкоў паміж прамысловымі прадпрыемствамі дзяржаў".

Як падкрэсліў старшыня Калегіі ЕЭК Міхаіл Мясніковіч, камісія ў штодзённым рэжыме працуе над рэалізацыяй узгодненых мер.

"Аператыўная рэакцыя з боку ўпаўнаважаных органаў дзяржаў-членаў дасць магчымасць стабілізаваць сітуацыю і пазбегнуць перабояў з пастаўкай неабходных тавараў, - адзначылі ў ЕЭК. - Вялікая ўвага была ўдзелена механізму разлікаў у нацыянальных валютах і парадку пералічэння ў даход дзяржаў-членаў сум увазных мытных, а таксама спецыяльных, антыдэмпінгавых, кампенсацыйных пошлін".

"Пасля дапрацоўкі праекты дакументаў будуць унесены на разгляд Савета ЕЭК", - дадалі ў прэс-службе.

Рабочая група высокага ўзроўню па стварэнні ўмоў для павышэння ўстойлівасці эканомік, уключаючы забеспячэнне макраэканамічнай стабільнасці, сфармавана распараджэннем Савета ЕЭК. Кіраўнік рабочай групы - міністр эканамічнага развіцця Расіі Максім Рашэтнікаў. У склад рабочай групы ўваходзяць старшыні цэнтральных (нацыянальных) банкаў, міністры эканомікі і міністры фінансаў краін ЕАЭС, старшыня праўлення Еўразійскага банка развіцця, а таксама міністры ЕЭК Руслан Бекетаеў, Сяргей Глазьеў і Андрэй Сляпнёў. Рабочая група зацвердзіла пералік мер па павышэнні ўстойлівасці эканомік. Ён складаецца з 33 мер і ахоплівае чатыры блокі: мытнае, мытна-тарыфнае і нетарыфнае рэгуляванне, ахоўныя меры; унутраны рынак і кааперацыя; фінансавыя і валютныя рынкі; міжнароднае эканамічнае супрацоўніцтва з трэцімі краінамі і інтэграцыйнымі аб`яднаннямі.

14 красавіка 2022, Масква
Эдуард Півавар - БЕЛТА