Суд прызнаў Уладзімера Грозава вінаватым у злоўжываньні, завалоданьні маёмасьцю ў вялікім памеры, нясплаце мытных пошлін. Пакараньне — 7 гадоў калёніі ўзмоцненага рэжыму з канфіскацыяй маёмасьці.

Грозаву залічылі час арышту ў Расеі і Беларусі. Яго затрымалі ў 2016 годзе ў Смаленскай вобласьці Расеі.

Працэс над Грозавым ішоў некалькі месяцаў і прыцягнуў дадатковую ўвагу, калі ў якасьці сьведкі на працэсе выступіў Патрыяршы экзарх Беларусі мітрапаліт Павел.

пабудова ў вёсцы Каменка,

участак у Рудзенскім сельсавеце,

офіснае памяшканьне ў Менску,

аўтамабілі «Аудзі» і «Шкода».

Суд пастанавіў вярнуць уласьнікам арыштаваныя на час сьледзтва аўтамабіль «Мэрсэдэс» і будынак у вёсцы Хацежына Менскага раёну. Экзархату вярнулі 10 адзінак тэхнікі — грузавыя аўтамабілі і аўтобусы.

Пасьля прысуду Грозаў сказаў „Слава Богу!“ і перахрысьціўся.

На пытаньне, ці будзе абскарджваць вырак, Грозаў не адказаў.

Сын Грозава Серафім лічыць, што доказаў віны бацькі ў судзе не было прыведзена. Ён мяркуе, што Ўладзімер Грозаў будзе абскарджваць прысуд: «7 гадоў ні за што — хіба гэта нармальна?»

Адвакат ад камэнтару адмовіўся.

Кіраўнік Расейскай праваслаўнай царквы ў Беларусі, якая спачатку падтрымала абвінавачаньні супраць Уладзімера Грозава, заявіў на судзе, што нанесеныя Грозавым царкве страты кампэнсаваныя, і папрасіў спыніць супраць яго крымінальны перасьлед. Паводле мітрапаліта, гэтую просьбу падтрымаў і ганаровы экзарх Беларускай праваслаўнай царквы Філарэт.

Паводле сьледзтва, Уладзімер Грозаў незаконна завалодаў 1,2 мільёна рублёў са сродкаў выдавецтва Беларускага экзархату.

Таксама экс-дырэктар, паводле Генэральнай пракуратуры, праз злоўжываньне пасадай завалодаў часткаю сядзібы XVII стагодзьдзя ў вёсцы Сёмкава пад Менскам.

Як сьведчылі дакумэнты, аб’екты сядзібы, прызнаныя гістарычнай каштоўнасьцю, былі незаконна ўнесеныя ў статут фірмы «СЕО», у якой асноўным уласьнікам і кіраўніком быў Уладзімер Грозаў.

Гэтым, паводле сьледзтва, Грозаў нанёс дзяржаве стратаў на 3,8 мільёна рублёў. Выстаўлялі Ўладзімеру Грозаву і абвінавачаньне ва ўхіленьні ад падаткаў на суму 210 тысяч рублёў.

У чэрвені як сьведка ў справе быў дапытаны Патрыяршы экзарх Беларусі мітрапаліт Павел. Ён адразу заявіў пра сваё шкадаваньне, што раней падпісаў хадайніцтва аб завядзеньні крымінальнай справы на Грозава.

«Сёньня я ўсё гэта разумею зусім інакш: тыя, хто на яго пісаў, яму зайздросьцілі», — сказаў суду мітрапаліт Павел. Паводле яго, гэтыя зайздросьнікі ўжо не працуюць ў выдавецтве экзархату.

У матэрыялах крымінальнай справы былі зьвесткі пра 14 аўтамабіляў, увезеных з-за мяжы праз царкоўныя структуры. Сярод іх і тыя, якімі завалодаў экс-кіраўнік выдавецтва экзархату Уладзімер Грозаў. Спэцыялісты ацэньвалі кошт аўтамабіляў у 150 тысяч даляраў.

Радыё Свабода, 27 верасьня 2018