Два беларускія буктрэйлеры, якія перамаглі ў пятым фестывалі мабільнага кіно velcom Smartfim, прынятыя да ўдзелу ў конкурсе прэстыжнага амерыканскага кінафестывалю iPhone Film Festival. 

Ролікі "1984" і "Множныя розумы Білі Мілігана" будуць змагацца за прызы шостага па ліку кінафоруму, які традыцыйна праходзіць у Беверлі-Хілз.

Журы iPhone Film Festival, у якое ўваходзяць прафесіяналы з розных абласцей кінаіндустрыі, вызначыць пераможцаў у пяці намінацыях: лепшы фільм, аператарская праца, музычнае відэа, анімацыя, дакументальны фільм. Вынікі фестывалю будуць падведзены ў лістападзе 2016 года.

Беларускія ролікі таксама зацікавілі арганізатараў міжнароднага кінафестывалю Super 9 mobile film fest, які базуецца ў Партугаліі.

Працы мінчан Аляксандра Абразцова ("1984") і Аліны Старковай ("Множныя розумы Білі Мілігана") уключаны ў асноўны конкурс і прэтэндуюць на прызы журы і глядацкіх сімпатый.

Асаблівасць фестывалю Super 9 mobile film fest заключаецца ў тым, што ён доўжыцца дзевяць месяцаў. Роўна столькі часу ёсць у рэжысёраў, каб паказаць свае фільмы і пазнаёміцца са сваім гледачом, які можа прагаласаваць за ўпадабаныя працы. Пераможцы фестывалю будуць абвешчаныя ў снежні, тады ж будзе ўручаны прыз журы, у склад якога, у прыватнасці, уваходзяць прадзюсар фільмаў Стэнлі Кубрыка Ян Харлан і крэатыўны дырэктар, уладальнік 22 "Канскіх львоў" Жуан Куціньё.

Ірына Турчына, БелаПАН
Мінск, 9 жніўня 2016