Пераможца першага нацыянальнага конкурсу "Міс Беларусь-98" Святлана Крук прадставіць краіну на конкурсе "Місіс Сусвет-2013". Шоу пройдзе з 4 па 12 жніўня на востраве Аруба (Карыбы).
Ідзе актыўная падрыхтоўка да мерапрыемства. Уборы для конкурсу рыхтуе вядомы беларускі дызайнер Юлія Латушкіна.
Святлана Крук больш як 12 гадоў замужам. У яе два сыны. Працуе ў сферы адукацыі і фэшн-індустрыі, займаецца дабрачыннасцю. У Святланы багаты вопыт удзелу ў міжнародных конкурсах. Яна была фіналісткай "Міс Еўропа-99", удзельніцай "Міс Свету-2000", заваявала тытул "Missis Beauty Millenium International-2012".
Конкурс "Місіс Сусвет" аналагічны шоу "Міс Свету" і "Міс Сусвет". Яго ўдзельніцы павінны быць замужам і могуць мець дзяцей. У мінулым годзе на міжнародным форуме Беларусь прадставіла Наталля Трафімава. Яна атрымала тытул "Місіс Дружба" і стала нацыянальным дырэктарам конкурсу "Місіс Сусвет Беларусь", а таксама дабілася права правядзення міжнароднага конкурсу "Місіс Еўропа-2012" у Мінску.
1 красавіка 2013, Мінск
БЕЛТА
