Беларускі ўрад зацвердзіў парадак арганізацыі харчавання педагагічных і іншых работнікаў устаноў адукацыі, адпаведная пастанова Саўміна №356 ад 31 мая афіцыйна апублікавана на Нацыянальным прававым інтэрнэт-партале.
Гэты парадак закране педагагічных і іншых работнікаў дзіцячых садоў, школ (акрамя вучылішчаў алімпійскага рэзерву), спецыяльных дзіцячых садоў, спецшкол і спецыяльных школ-інтэрнатаў, а таксама цэнтраў карэкцыйна-развіваючага навучання і рэабілітацыі і спецыяльных навучальна-выхаваўчых устаноў, якія фінансуюцца з рэспубліканскага ці мясцовых бюджэтаў.
Згодна з дакументам, работнікі гэтых устаноў змогуць платна харчавацца ў сталовых сваіх арганізацый адзін раз у дзень, але не ў абавязковым парадку, а па жаданні.
Для гэтага яны змогуць афармляць папярэдні заказ па прыкладным двухтыднёвым рацыёнам харчавання вучняў старэйшай узроставай групы.
"Плата за харчаванне будзе спаганяцца ў памеры 100% ад дзеючых грашовых норм расходаў на харчаванне ў дзень на аднаго вучня старэйшай групы", - гаворыцца ў пастанове.
Акрамя гэтага, пры аплаце можа прымяняцца павышаючы каэфіцыент, калі гэта "прадугледжана заканадаўствам". Калі ў нейкі дзень настаўнік, выхавальнік ці іншы супрацоўнік установы адукацыі не хадзіў у сталовую і не браў сваю порцыю ежы, плаціць за гэта не давядзецца.
Уносіць плату за харчаванне трэба будзе па факце, гэта значыць кожны месяц не пазней за 25-е чысло. Ёсць і іншы варыянт аплаты – можна напісаць пісьмовую заяву, каб грошы за харчаванне ўтрымліваліся з заработнай платы.
Пастанова ўступае ў сілу пасля яе афіцыйнага апублікавання.
Праблема з харчаваннем настаўнікаў
Раней настаўнікі з шэрага школаў паведамлялі, што ім забаранілі купляць ежу ў сталовых, дзе харчуюцца вучні. Прычына ў тым, што цэны на стравы субсідзіруюцца, і яны ўстаноўлены менавіта для дзяцей.
Спачатку каменціраваць сітуацыю адмовіліся і мясцовыя ўлады, і міністэрства адукацыі. Пазней ведамства заявіла, што праблем з харчаваннем настаўнікаў у школах няма, і назвала гэта "фэйкам".
Затым кіраўнік ведамства Андрэй Іванец анансаваў прыняцце праўкі ў Кодэкс аб адукацыі, якая ўстанаўлівае ўсе ўмовы для такога харчавання. Аднак кошт абеду будзе "з невялікім павышаючым каэфіцыентам".
Гэтыя змены афіцыйна набылі моц з 22 сакавіка 2023 года.
