Перад ваеннаслужачымі брыгады выступіў намеснік міністра абароны Беларусі па ўзбраенні генерал-маёр Іван Дырман, які адзначыў, што "Тор-М2" вылучаецца высокай манеўранасцю, мабільнасцю, аўтаматызацыяй баявой работы, эфектыўнасцю стральбы па шырокім класе цэляў. Намеснік міністра абароны адзначыў: "Пераўзбраенне 120-ай зенітна-ракетнай брыгады з`яўляецца яркім прыкладам плённага супрацоўніцтва Беларусі з Расійскай Федэрацыяй".

На мерапрыемстве прысутнічалі і прадстаўнікі ад Расійскай Федэрацыі.

Невялікае інтэрв`ю ўзяў у дырэктара канструктарскага бюро ААТ "Іжэўскі электрамеханічны завод "Купал" Вячаслава Карташова.

— Зенітна-ракетны комплекс "Тор-М2" выглядае даволі эфектна. Але няўжо ён лепшы ў свеце?

— У сваім класе — так. Выпрабаванні праводзіліся ў прысутнасці 16 прадстаўнікоў розных краін, і эфектыўнасць комплексу іх уразіла. У 2009 годзе мы ўпершыню паказалі стральбу 4 ракетамі адначасова. Ніхто аналагічнага ўзбраення не мае.

— Узбраенне складанае, а колькі часу неабходна, каб разлік быў з комплексам на "ты"?

— Паўгода, узбраенне сапраўды складанае і патрабуе ад разліку адпаведнай падрыхтоўкі.

— Якая сітуацыя на вашым заводзе? Расійскі ваенна-прамысловы комплекс стаў больш моцным?

— Выжываем.

Дадам, што асабовы склад брыгады прайшоў вучобу і перападрыхтоўку ў Расіі.

Задаў пытанне і камандуючаму Заходняга аператыўна-тактычнага камандавання генерал-маёру Дзмітрыю Пахмелкіну.

— Дзмітрый Пятровіч, батарэя ЗРК "Тор-М2" так і будзе знаходзіцца ў цэнтры Баранавічаў?

— Сёння, можна сказаць, урачысты момант, а ўжо ў студзені часць будзе знаходзіцца ў раёне інтэнсіўных палётаў авіяцыі.

Супрацоўніцтва паміж міністэрствамі абароны Беларусі і Расіі ажыццяўляецца на ўзаемавыгаднай партнёрскай аснове і ўключае ў сябе сумесную дзейнасць па захаванні і развіцці кааперацыі абаронна-прамысловых комплексаў суверэнных дзяржаў.

Дарэчы, высокая манеўранасць ЗРК "Тор-М2" забяспечваецца комплексам колавага шасі Мінскага завода калёсных цягачоў.

Супрацоўніцтва будзе працягвацца.

Сымон Свістуновіч
Звязда, 29 снежня 2011