Падазраваны ў двайным забойстве ў стаўбцоўскай школе (Мінская вобласць) 15-гадовы дзесяцікласнік не знаходзіўся ні ў стане алкагольнага ап`янення, ні пад уздзеяннем наркатычных сродкаў і псіхатропных рэчываў.

Для ўстанаўлення псіхічнага стану падлетка вырашаецца пытанне аб прызначэнні комплекснай стацыянарнай судовай псіхолага-псіхіятрычнай экспертызы.

Прызначаныя шэраг іншых даследаванняў, правесці якія даручана спецыялістам Дзяржаўнага камітэта судовых экспертыз.

Акрамя таго, паводле вынікаў першапачатковых следчых дзеянняў у дачыненні да падазронага распачатая яшчэ адна справа — аб замаху на забойства падлеткаў, якія знаходзяцца на лячэнні, і іншых асоб згодна з ч. 1 арт. 14 і ч. 2 арт. 139 Крымінальнага кодэкса.

Як паведамлялася, раніцай 11 лютага 15-гадовы падлетак ударыў нажом 50-гадовую настаўніцу гісторыі і грамадазнаўства, а таксама 17-гадовага вучня 11-га класа, якія памерлі на месцы здарэння. Акрамя таго, ён нанёс ўдары двум аднакласнікам, якія шпіталізаваныя. Іх жыццю, як сцвярджаюць медыкі, зараз нічога не пагражае.

Крымінальную справу аб двайным забойстве ў школе ў Стоўбцах расследуе галоўнае следчае ўпраўленне Следчага камітэта.

Працягваюцца допыты сведак, у тым ліку медыцынскіх работнікаў, супрацоўнікаў органаў унутраных спраў. Следчыя вывучаюць матэрыялы, якія характарызуюць асобу падазронага, паведамляе прэс-служба СК.

Андрэй Серада, БелаПАН
Мінск, 13 лютага 2019