Паводле яе слоў, колькасць выстаўленых на продаж кватэр працягвае расці (з пачатку кастрычніка колькасць кватэр павялічылася на 5% да 7 тыс.), аднак актыўнасць пакупнікоў з пачатку восені пастаянна зніжаецца. Спецыяліст гэтую тэндэнцыю тлумачыць тым, што асноўная хваля продажу ў бягучым годзе прыпала на лета. "Колькасць зарэгістраваных здзелак стала рэкорднай за апошнія 10 гадоў, і цяпер попыт моцна аслабеў. Але варта заўважыць, што па-ранейшаму ёсць пакупнікі, арыентаваныя на набыццё самых танных кватэр коштам каля 30 тыс. долараў. Падобных заявак на куплю зараз больш за 30%", — сказала намеснік дырэктара групы кампаній.

На яе думку, у найбліжэйшы час чакаецца захаванне падобнай сітуацыі. "Колькасць выстаўленых на продаж кватэр будзе расці, а аб`ектыўных перадумоў для актывізацыі пакупнікоў няма. Ужо зараз шырокі выбар на рынку падштурхоўвае пакупнікоў як да разгляду большай колькасці варыянтаў кватэр (10 кватэр не мяжа), так і да большага торгу. Усе гэта непасрэдна ўплывае на кошты — паступова яны пачынаюць зніжацца. У лістападзе сярэдняя цана здзелкі ўжо знізілася на 2%", — адзначыла Кудзелка.

Паводле яе слоў, сёння сітуацыя на рынку нерухомасці вельмі падобная на аналагічную канца 2008-га — пачатку 2009 года. Тады за некалькі месяцаў цэны на кватэры ўпалі на 30%. "Такога зніжэння цэн мы не прагназуем, але перад- і постнавагодняе зацішша пачнецца раней і скончыцца пазней, чым гэта было ў папярэднія гады", — лічыць эксперт.

Яна зазначыла: калі летам попыт быў на кватэры розных класаў якасці і цэнавых катэгорый, то цяпер пакупнік аддае перавагу жыллю, якое не патрабуе вялікіх грашовых укладанняў, тэрытарыяльна размешчанае ў раёнах з развітай транспартнай даступнасцю.

Больш за ўсё здзелак з кватэрамі ў дамах 1971—1999 гадоў пабудовы (гэта самая вялікая група дамоў з прадстаўленых на рынку). "Але ў любым выпадку пры ўсталяванні аб`ектыўнай цэны прадаўцам падобных кватэр можна разлічваць на стабільны інтарэс з боку пакупнікоў", — адзначыла Кудзелка.

Паводле інфармацыі групы кампаній, сярэднія цэны здзелак з кватэрамі стандартных спажывецкіх якасцяў у лістападзе сфармаваліся на ўзроўні 1.140 долараў за 1 кв. м для аднапакаёвых кватэр, 1.050 — для двухпакаёвых і 960 — для трохпакаёвых кватэр.

"Разам са зніжэннем цэнаў асаблівую цікавасць пакупнікі сталі праяўляць да каркасных і цагляных дамоў, пабудаваным пасля 2000 года. Цяпер яны сталі значна больш даступнымі па цане, іх кошт толькі трохі вышэйшы за кошт панэльных дамоў. Многія пакупнікі называюць кватэры ў падобных дамах найбольш аптымальным выбарам. У той час як сучасныя панэльныя дамы асаблівай папулярнасцю не карыстаюцца", — рэзюмавала Кудзелка.

Марына Носава, БелаПАН
Мінск, 28 лістапада 2016