"Сёння беларускі пракат з`яўляецца састаўной часткай міжнароднай дыстрыб`ютарскай сеткі. Фактычна рэпертуар айчынных кінатэатраў фарміруюць замежныя дыстрыб`ютарскія і пракатныя расійскія кампаніі. Такая сітуацыя ператварае беларускія фільмы ў мала запатрабаваны прадукт на тым рынку, для якога яны перш за ўсё ствараюцца", - сказаў міністр.

Паводле яго слоў, адсутнічаюць аднолькавыя падыходы да структуры арганізацый, што ажыццяўляюць пракат, распаўсюджванне і паказ фільмаў у рэгіёнах. Сур`ёзную трывогу выклікаюць прапановы асобных рэгіёнаў, у прыватнасці Мінскага аблвыканкама, аб фактычнай ліквідацыі абласной кінавідэапракатнай арганізацыі, перадачы функцыі закупак фільмаў профільнаму структурнаму падраздзяленню Міністэрства культуры. Аднак Міністэрства культуры як рэспубліканскі орган дзяржаўнага кіравання не можа займацца фінансава-гаспадарчай дзейнасцю, а сродкі для закупкі фільмаў у бюджэце не прадугледжаны, таму такія крокі фактычна могуць прывесці да ліквідацыі кінапракату Мінскай вобласці.

Мерапрыемствы Дзяржаўнай праграмы "Культура Беларусі" на 2011-2015 гады ў частцы будаўніцтва новых кінатэатраў з-за адсутнасці фінансавання не выкананы. Не забяспечана прыцягненне замежных інвестыцый на развіццё сеткі кінатэатраў краіны. Арганізацыі - вытворцы фільмаў адчуваюць патрэбу ў мастаках-мультыплікатарах, рэжысёрах мантажу фільмаў; кінапракатныя арганізацыі - у інжынерна-тэхнічных кадрах для эксплуатацыі лічбавага кінапраекцыйнага абсталявання.

Міністр адзначыў, што не выкарыстоўваюцца ў поўнай меры магчымасці РГА "Беларускі саюз кінематаграфістаў" і ГА "Беларуская гільдыя акцёраў кіно" ў прапагандзе дасягненняў беларускага кінамастацтва.

16 снежня 2014, Мінск
БЕЛТА