17 кастрычніка на тэрыторыі Нацыянальнага аэрапорта Мінск адбылося ўрачыстае адкрыццё лагістычнага цэнтра па апрацоўцы міжнароднай пошты РУП "Белпошта", у якім былі прадстаўлены найноўшыя тэхналагічныя рашэнні прыёму, апрацоўкі і падачы на мытны дагляд міжнародных паштовых адпраўленняў.

У новым модульным будынку з вытворчай плошчай больш за 1,5 тысячы квадратных метраў будзе апрацоўвацца міжнародная пошта, якая паступае ў Беларусь паветраным шляхам. Лагістычны цэнтр аснашчаны сучасным абсталяваннем, інтэграваным з міжнароднай сістэмай IPS цэнтра паштовых тэхналогій Сусветнага паштовага саюза і інфармацыйнай сістэмай РУП "Белпошта". У цэнтры выкарыстоўваецца камбінаваная транспартная сістэма з арганізацыяй на працоўных месцах максімальна магчымай механізацыі і аўтаматызацыі тэхналагічных працэсаў апрацоўкі уваходнай міжнароднай пошты.

Лагістычны цэнтр ажыццяўляе апрацоўку і мытнае афармленне, міжнародных паштовых адпраўленняў, якія паступаюць у Беларусь авіятранспартам, сем дзён на тыдзень, кругласутачна, а гэта на сённяшні дзень дазваляе аптымізаваць тэрміны апрацоўкі ўваходных міжнародных паштовых адпраўленняў і паскараць іх дастаўку атрымальнікам. Тэрміны апрацоўкі аптымізуюцца да аднаго-двух дзён.

За дзевяць месяцаў з агульнага аб`ёму ўваходных міжнародных адпраўленняў з таварным укладаннем у лагістычным цэнтры апрацавана каля трох мільёнаў адпраўленняў, або больш за 30% ад агульнай колькасці.

Таксама за названы перыяд з пачатку года мытняй "Мінск-2" пры кантролі міжнародных паштовых адпраўленняў спынена пяць злачынстваў, звязаных з незаконным увозам у рэспубліку наркатычных і псіхатропных рэчываў; выяўлена 14 адміністрацыйных парушэнняў, звязаных з перасылкай лекавых прэпаратаў, якія змяшчаюць псіхатропныя рэчывы; 46 спроб незаконнай перасылкі насення раслін, якія выкарыстоўваюцца як сыравіна для вытворчасці наркотыкаў; канфіскавана больш за 530 штук насення канапель і спор галюцынагенных грыбоў; спынена 12 спроб перамяшчэння частак агнястрэльнай зброі і халоднай зброі і 17 фактаў незаконнай перасылкі культурных каштоўнасцяў, сярод якіх манеты, паштовыя маркі, грашовыя банкноты, дэкаратыўныя талеркі, рарытэтныя друкаваныя выданні.

Аляксей Арэшка, БелаПАН
Мінск, 17 кастрычніка 2016