Грамадзянін Венгрыі вёз у Расію тэлевізары, але згодна з таварасуправаджальнымі дакументамі ў грузавым адсеку павінен быў знаходзіцца іншы тавар — "панэль вадкакрышталічная, актыўныя матрычныя прылады на вадкіх крышталях для тэлевізараў каляровай выявы, без корпусу".

Як паведамілі ў прэс-групе Гомельскай мытні, у выніку мытнага нагляду аўтамабіля было выяўлена, што ў грузавым адсеку знаходзяцца два віды тавару: тэлевізары CY-HH032AGLV2V у колькасці 350 штук і столькі ж тэлевізараў CY-HH048AGLV1V. Гэта, як указваюць мытнікі, не адпавядае звесткам, заяўленым у таварасуправаджальных дакументах.

Такім чынам перавозчык спрабаваў пазбегнуць выплаты 12-працэнтнай мытнай пошліны на ўвоз тэлевізараў, лічаць супрацоўнікі беларускай мытні. Па факце парушэння мытнага заканадаўства пачаты адміністрацыйны працэс.

Алена Германовіч, БелаПАН
Гомель, 30 студзеня 2015