Золатавалютныя рэзервы Беларусі на 1 ліпеня, паводле папярэдніх звестак, склалі $11,537 млрд у эквіваленце. Такія звесткі апублікаваныя на сайце Нацыянальнага банка.

Найбольшую долю ў структуры міжнародных рэзервовых актываў Беларусі займаюць актывы ў замежнай валюце і манетарнае золата.

Паводле звестак Нацбанка, аб’ём замежнай валюты ў рэзервах на 1 ліпеня гэтага года склаў $4,427 млрд, павялічыўшыся за чэрвень на $338,9 млн, аб’ём манетарнага золата — амаль $5,692 млрд, павялічыўшыся на $19,4 млн.

Золатавалютныя рэзервы — высокаліквідныя актывы, якія знаходзяцца пад кантролем дзяржаўных органаў. Згодна з мэтавымі паказчыкамі грашова-крэдытнай палітыкі, аб’ём міжнародных рэзервовых актываў Беларусі на канец 2025 года павінен скласці не менш як $7,1 млрд.

Звязда, 2 ліпеня 2025