"Польшча возьме ўдзел у кампенсацыі арыштаванай маёмасці беларускага праваабаронцы Алеся Бяляцкага", — заявіў міністр замежных спраў Польшчы Радослаў Сікорскі 29 лістапада на Форуме грамадзянскай супольнасці Усходняга партнёрства ў Познані (Польшча).
Так ён пракаментаваў чуткі аб тым, што польскае пасольства ў Мінску нібыта адмовілася браць удзел у выплаце кампенсацыі.
Нагадаем, віцэ-прэзідэнт Міжнароднай федэрацыі правоў чалавека, кіраўнік закрытага ўладамі праваабарончага цэнтра "Вясна" Алесь Бяляцкі прыгавораны да чатырох з паловай гадоў пазбаўлення волі ў калоніі ўзмоцненага рэжыму з канфіскацыяй маёмасці. Такое рашэнне аб`явіў 24 лістапада суддзя суда Першамайскага раёна Мінска Сяргей Бандарэнка. Праваабаронца прызнаны вінаватым на падставе часткі 2 артыкула 243 Крымінальнага кодэкса (утойванне даходаў у асабліва буйным памеры).
Сёння на прэс-канферэнцыі ў Познані Сікорскі паведаміў, што нядаўна размаўляў з жонкай Алеся Бяляцкага і Польшча спрабуе дапамагчы яго сям`і — але так, каб не нашкодзіць праваабаронцы і яго блізкім.
Паводле слоў кіраўніка МЗС, Польшча асуджае прыгавор, вынесены Бяляцкаму. Еўрасаюз, падкрэсліў ён, можа пашырыць спіс неўязных, уключыўшы ў яго адказных за крымінальны пераслед беларускага праваабаронцы.
Як раней паведамляў БелаПАН, Форум грамадзянскай супольнасці Усходняга партнёрства праходзіць у Познані 28—30 лістапада. Ад Беларусі ў ім удзельнічаюць 24 прадстаўнікі розных грамадскіх арганізацый, а таксама спецыяльна запрошаны госць ад закрытага ўладамі праваабарончага цэнтра "Вясна".
Многія ўдзельнікі беларускай дэлегацыі былі сёння на форуме ў футболках з партрэтам Бяляцкага.
Антон Тарас,
БелаПАНПознань, 29 лістапада 2011
