Віншаванне на ўрачыстасць Божага Нараджэння біскупа Антонія Дзям'янкі
«Няхай Сын Божы прынясе давер туды, дзе пануе сумненне, а роспач і абыякавасць пераменіць у шчырую любоў і радасць жыцця», — жадае біскуп Пінскі.
«Вось Дзева зачне i народзіць Сына,
i дадуць Яму iмя Эмануэль,
што азначае — з намi Бог» (Мц 1, 23)
Дарагія браты і сёстры ў Хрысце!
З нагоды святаў Божага Нараджэння і Новага года жадаю, каб гэты незвычайны для ўсіх нас час мы перажывалі як дар Божага Провіду ў будаванні лепшай будучыні.
Няхай асаблівасць перажывання сёлетніх святаў і тыя жыццёвыя выклікі, якія стаяць перад намі, дапамогуць кожнаму з нас адкрыць для сябе нешта новае і добрае.
Нараджэнне Хрыста напоўніла свет зусім іншым глыбінным сэнсам. Няхай таксама і нам перажыванне таямніцы калядных святаў дапаможа адкрыць новыя перспектывы ў адносінах з Богам і бліжнім.
Няхай Бог, які стаўся Чалавекам, учыніць усіх людзей яшчэ больш чалавечнымі, каб усе памяталі, што мы створаныя па Яго вобразу і падабенству. Каб кожны з нас няспынна ўзрастаў у веры, не губляў надзеі, а перадусім любіў Бога і ўзлюбленае Ім стварэнне. Няхай Сын Божы прынясе давер туды, дзе пануе сумненне, а роспач і абыякавасць пераменіць у шчырую любоў і радасць жыцця.
Радасных святаў Божага Нараджэння!
Хрыстус нарадзіўся! Славім Яго!
+ Антоні Дзям’янка
Біскуп Пінскі
Пінск, Божае Нараджэнне 2020
____________________________________________________________
____________________________________________________________
____________________________________________________________
Віншаванні з Божым Нараджэннем ад біскупа Аляксандра Яшэўскага SDB
«Жадаю, каб свята Божага Нараджэння ў гэтым годзе было для нас благаслаўлёным, каб ніводная сям’я не смуткавала, каб кожны мог сесці за святочным сталом побач са сваімі блізкімі. Няхай наш Збаўца народзіцца нанова праз сваю ласку ў нашых душах і сэрцах», — кажа Біскупскі вікарый для Магілёва і Магілёўскай вобласці.
____________________________________________________________
Віншаванні біскупа Аляксандра Кашкевіча на свята Божага Нараджэння і Новы год
«Жадаю падзяліцца аплаткай з усімі, каб гэтыя святы зблізілі нас яшчэ больш адзін з адным, нарадзілі ўзаемную зычлівасць і дабрыню, жаданы мір і прабачэнне, якія, як ніколі, патрэбныя нашаму грамадству і нашай краіне», — піша біскуп Гродзенскі.
«Хвала на вышынях Богу, а на зямлі спакой людзям добрай волі»
(Лк 2, 14).
Умілаваныя ў Хрысце Пану браты і сёстры!
Дарагія вернікі дыяцэзіі!
Перад намі цудоўныя святы Божага Нараджэння, якія мы перажываем заўсёды ў асаблівай атмасферы цеплыні і сярод самых блізкіх людзей. Хоць сёлетнія святы, напэўна, будуць іншыя, чым усе, якія мы памятаем.
Аднак Божае Нараджэнне заўсёды прыносіць радасць і надзею.
Надзею, што — з Божай дапамогай — мы пройдзем разам праз гэты цяжкі час і хутка зноў зможам нармальна жыць, функцыянаваць, арганізоўваць у тым жа фармаце, што і раней, усе нашы дыяцэзіяльныя ўрачыстасці і сустрэчы, якія ўзбагачаюць нашу веру і набліжаюць нас да Пана Бога і іншага чалавека.
Перш, чым гэта стане магчыма, жадаю ў гэты святы час Нараджэння Пана быць блізка да вашых сем’яў, парафіяльных супольнасцяў, чалавечых сэрцаў. Жадаю быць разам з вамі праз малітву, захоўванне нашых традыцый, праз веру і любоў.
У гэты выключны і адзіны на працягу ўсяго года вігілійны вечар жадаю падзяліцца аплаткай з усімі, каб гэтыя святы зблізілі нас яшчэ больш адзін з адным, нарадзілі ўзаемную зычлівасць і дабрыню, жаданы мір і прабачэнне, якія, як ніколі, патрэбныя нашаму грамадству і нашай краіне.
Няхай гэтыя святы схіляюць нас усіх да чуласці ў дачыненні да хворых, бедных, самотных і церпячых.
Дарагія браты і сёстры!
Жадаю, каб святкаванне Божага Нараджэння было часам нараджэння і ўмацавання ў нас самага лепшага, прыгожага і высакароднага, а Новы 2021 год, які набліжаецца, быў поўны добрых хвілін, даў пачуццё бяспекі, а таксама ўпэўненасць, што Божая любоў спадарожнічае ўсім тым, хто ёй давярае.
Благаслаўлёных святаў Божага Нараджэння і шчаслівага Новага года!
З пастырскім бласлаўленнем
Аляксандр Кашкевіч
Біскуп Гродзенскі
Гродна, Божае Нараджэнне 2020 г.
____________________________________________________________
Віншаванне біскупа Юзафа Станеўскага на святы Божага Нараджэння і Новы год
Віншаванне біскупа Юзафа Станеўскага на святы Божага Нараджэння і Новы год
«Заахвочваю вас, браты і сёстры, сябры, людзі добрай волі, суайчыннікі, да малітвы ля ясляў Езуса Хрыста, нашага Пана і Збаўцы, за нашу Айчыну і яе народ на парозе і на працягу новага 2021 года», — піша Генеральны вікарый Гродзенскай дыяцэзіі.
Любыя майму сэрцу браты і сёстры!
Сардэчна вітаю вас у час падзякі Пану Богу за 2020 год і малітвы аб дараванні нам Божым Провідам новага 2021 года.
Як мы ўжо ведаем, Папа Францішак 3 кастрычніка бягучага года ў Асізі падпісаў энцыкліку Fratelli Tutti — Аб братэрстве і сацыяльным сяброўстве — у якой між іншым прыходзіць да высновы, што «жыццё — гэта не час, які мінае, але час сустрэчы». І таму, лічыць Пантыфік, «ніхто не можа адчуць каштоўнасць жыцця без рэальных твараў тых, каго ён любіць». А «Бог не глядзіць вачыма, Бог глядзіць сэрцам».
Таму дзякуем вам, людзі ў белых халатах, за ваш «позірк сэрцам», за «час сустрэчы», за ваш «дар самога сябе», за вашу барацьбу за кожнае жыццё.
Мы не бачым вашых твараў, з-за антывірусный маскі цяжка распазнаць, хто нахіляецца нада мной, хто гэты самаранін. За вашу «ўмеласць бачыць сэрцам» мы дзякуем і молімся Богу.
Мае дарагія сябры. Час мінае, а з ім у гісторыю адыходзіць высакосны 2020 год, і толькі час сустрэчы ў братэрстве і сацыяльным сяброўстве з далікатным полымем цеплыні сэрца і позіркам спачування пакінуць свой след у памяці кожнага з нас як пазітыўны багаж, які мы ахвотна забярэм з сабой у новы 2021 год — «новы час сустрэчы». Якім ён будзе для нас і што запомняць з нашай сустрэчы тыя, якіх даў нам Пан?
Таму за Папам Францішкам хочацца паўтарыць: «Касцёл — гэта дом з адчыненымі дзвярыма, бо ён — маці. І падобна Марыі, Маці Езуса, мы хочам быць Касцёлам, які служыць, які выходзіць з дому, выходзіць са сваіх святыняў, выходзіць са сваіх сакрыстый, каб суправаджаць жыццё, падтрымліваць надзею, быць знакам адзінства, каб будаваць масты, разбураць муры, сеяць насенне прымірэння» (гл. FT 276). Гэтыя і іншыя шляхетныя намаганні, на думку Пантыфіка, маюць права на рэалізацыю, калі сучасныя зразумеюць, што «зямля ёсць пазыкай, якую атрымлівае кожнае пакаленне і павінна перадаць яе наступнаму пакаленню».
Аднак вельмі важна, «каб мы не страцілі здольнасці заўважаць неабходнасць перамены сэрца, звычаяў і ладу жыцця».
Мае дарагія. Новы 2021 год згодна з воляй Святога Айца Францішка прысвечаны святому Юзафу, апекуну Дзіцяткі Езуса і абранніку Насвяцейшай Панны Марыі. З гэтай нагоды Святы Айцец напісаў Апостальскі ліст Patris corde («Бацькоўскім сэрцам»), прысвечаны 150-годдзю прызнання святога Юзафа апекуном Каталіцкага Касцёла. У гэтым лісце Пантыфік заахвочвае нас нанава «зразумець сэнс працы, якая надае годнасць», якая «становіцца ўдзелам у справе збаўлення» і «магчымасцю рэалізацыі» для сябе і сваёй сям’і. Ён заклікае «адкрыць каштоўнасць, важнасць і неабходнасць працы», каб закласці асновы «новай нармальнасці, дзе нікога не выключаюць, каб з годнасцю і радасцю есці хлеб, які з’яўляецца плёнам працы». «Ніводзін малады, ніводзін чалавек, ніводная сям’я без працы!» — такі дэвіз прапануе Папа ў 2021 годзе.
Заахвочваю вас, браты і сёстры, сябры, людзі добрай волі, суайчыннікі, да малітвы ля ясляў Езуса Хрыста, нашага Пана і Збаўцы, за нашу Айчыну і яе народ на парозе і на працягу новага 2021 года — аб «хвале Богу на вышынях, аб супакоі людзям на зямлі сінявокай Бацькаўшчыны і каб на нашым стале заўсёды быў хлеб і да хлеба».
Са святам і Новым годам.
Юзаф Станеўскі
Дапаможны біскуп Гродзенскай дыяцэзіі
Гродна, Божае Нараджэнне 2020 г.
____________________________________________________________
____________________________________________________________
Віншаванне біскупа Алега Буткевіча са святам Божага Нараджэння
«Няхай жа і мы не застанемся ўбаку ад Падзеі, якую Бог падрыхтаваў для нас, каб распаліць нашае сэрца агнём сваёй Любові. Каб мы сталі больш адкрытыя і ўважлівыя адзін да аднаго, каб самі навучыліся любіць і цаніць тое, што маем у сваім жыцці, а перадусім само жыццё, як дар бязмежнай Божай мудрасці», — кажа біскуп Віцебскі.
Дарагія браты і сёстры ў Хрысце, паважаныя суайчыннікі!
Ужо хутка адыдзе ў гісторыю чарговы год нашага жыцця. Год 2020-ы. Нам вельмі хацелася б, каб разам з ім адышлі ў гісторыю і больш не вярталіся тыя цяжкасці і праблемы, якія ён нам прынёс. Мы молім аб гэтым Бога і спадзяёмся, што нас не пакіне. Таму з вялікай надзеяй сустракаем свята Яго нараджэння — нараджэння Слова, якое «…сталася целам і пасялілася між намі» (Ян 1, 14). Менавіта такі адказ дае Бог чалавеку, які церпіць: «…вось Я з вамі ва ўсе дні, аж да сканчэння веку» (Мц 28, 20). Я з вамі, каб вас умацаваць, каб даць вам сілу, каб разам з вамі ўзяць крыж.
Узяць яго ўжо зараз тут, лежучым у зімнай стайні, захутаным у матчыну хустку, сярод жывёлаў у іх жолабе з сенам.
І сярод цемры трываючага змроку Неба абвяшчае нам вялікую радасць! Радасць з таго, што нарадзіўся доўгачаканы Збаўца. Нарадзіўся Той, хто з’яўляецца «Дарогай, Праўдай і Жыццём» (Ян 14, 6). Хто нясе справядлівасць, любоў і прабачэнне. Той, хто пазней скажа пра сябе: «Я — святло свету. Хто ідзе за Мною, той не будзе хадзіць у цемры, але будзе мець святло жыцця» (Ян 8, 12). Нарэшце, Той, хто прыйшоў, каб зруйнаваць «мур варожасці» (Эф 2, 14), які падзяляе людзей.
Таму нябесныя хоры анёлаў заклікаюць пастушкоў, людзей простых і адкрытага сэрца, каб прыйсці і пакланіцца Добраму Пастыру людскіх душаў. Таму зорка вядзе Мудрацоў з усходу, каб сваімі дарамі вызналі веру ў Каралеўскую моц, Святарскую веліч і Людскую годнасць Нованароджанага Валадара сусвету. Таму ўвесь свет глядзіць са здзіўленнем на незвычайныя Божыя справы.
Няхай жа і мы не застанёмся ўбаку ад Падзеі, якую Бог падрыхтаваў для нас, каб распаліць нашае сэрца агнём сваёй Любові.
Каб мы сталі больш адкрытыя і ўважлівыя адзін да аднаго, каб самі навучыліся любіць і цаніць тое, што маем у сваім жыцці, а перадусім само жыццё, як дар бязмежнай Божай мудрасці.
Хрыстос нарадзіўся! Славім Яго! І няхай гэтае Божае Немаўля стане для кожнага з нас крыніцай надзеі, святла і супакою. А Яго бласлаўленне спадарожнічае нам і нашай роднай Беларусі праз увесь надыходзячы 2021 год.
Cа святам!
+ Алег Буткевіч
Біскуп Віцебскі
____________________________________________________________
____________________________________________________________
Святочнае віншаванне архімандрыта Сяргея (Гаека)
Са словамі віншавання звярнуўся да вернікаў Апостальскі візітатар Беларускай Грэка-Каталіцкай Царквы архімандрыт Сяргей (Гаек).
____________________________________________________________
Каляднае віншаванне Апостальскага Нунцыя ў Беларусі арцыбіскупа Антэ Ёзіча
Апостальскі Нунцый Антэ Ёзіч кіруе словы віншавання з Божым Нараджэннем вернікам Каталіцкага Касцёла ў Беларусі і прадстаўнікам іншых хрысціянскіх канфесій, а таксама перадае благаслаўленне Папы Францішка ўсяму беларускаму народу.
Віншаванне Апостальскага Нунцыя ў Беларусі арцыбіскупа Антэ Ёзіча са святам Божага Нараджэння і Новым, 2021 годам
Дарагія браты і сёстры,
у гэтыя святочныя дні я звяртаюся са словамі віншавання перадусім да вернікаў Каталіцкага Касцёла ў Беларусі і да хрысціянаў, якія разам з намі адзначаюць Нараджэнне Хрыста. Няхай Збаўца, які дзве тысячы гадоў таму нарадзіўся ў Бэтлееме, напоўніць нас радасцю і супакоем.
Няхай свята Яго Нараджэння стане часам міру і згоды, часам перамогі святла над цемраю, а любові — над нянавісцю.
Я звяртаюся таксама да нашых праваслаўных братоў і сясцёр і тых, хто будзе перажываць свята Божага Нараджэння праз два тыдні. Хоць мы святкуем у розны час, аднак нас аб’ядноўвае адзіная радасць. Бог прыйшоў на свет, каб дапамагчы нам пераадольваць падзелы і будаваць адзінства ў разнастайнасці. Замест старых моў, змяшаных падчас будавання Вавілонскай вежы, Ён сваім Нараджэннем у целе даў нам новую мову — мову любові, аднолькава зразумелую ўсім людзям ва ўсе часы і на ўсіх кантынентах. Няхай гэтая найпрыгажэйшая мова спрыяе развіццю дыялогу і ўзаемаразумення паміж усімі вызнаўцамі Хрыста.
Акрамя таго, я звяртаюся да людзей, якія яшчэ не сустрэліся з Богам. Няхай свята Хрыстова Нараджэння прынясе вам адчуванне жывой прысутнасці Вышэйшага Дабра, увасобленага ў маленькім Немаўлятку. Калі вы гэта адчуеце, ваша сэрца зможа адкрыць і прыняць самую важную праўду, якая адкрые вам новыя жыццёвыя гарызонты.
Асаблівым чынам я хачу звярнуцца да прадстаўнікоў дзяржаўных уладаў і ўсіх людзей, якія паспрыялі таму, каб на Калядныя святы ў Беларусь мог вярнуцца арцыбіскуп Тадэвуш Кандрусевіч. Няхай Бог шчодра ўзнагародзіць усіх вас, дзякуючы каму пастыр можа сустрэць Нараджэнне Хрыста разам з пастваю, са сваім духавенствам і вернікамі. Як жа цудоўна і прыгожа, што ўся сям’я беларускага Касцёла можа перажыць гэтае вялікае свята разам са сваім шматгадовым галавой і ў хуткім часе годна адзначыць яго юбілей.
Паважаныя сябры, я перадаю віншаванне і благаслаўленне Папы Францішка ўсяму народу ўзлюбленай Беларусі.
У гэты няпросты час, пазначаны пандэміяй каранавірусу і складанай сітуацыяй у беларускім грамадстве, я жадаю ўсім вам і вашым блізкім міру і згоды, а таксама здароўя, радасці і дабрабыту на кожны дзень Новага, дзве тысячы дваццаць першага года.
Вясёлых Калядаў і шчаслівага Новага года!
catholic.by, 24 снежня 2020
Кoличество переходов на страницу: 209
| Версия для печати | Сообщить администратору | Сообщить об ошибке | Вставить в блог |
